မြန်မာစာဂုဏ်ထူး

ကွန်မင့်တခု = ကျမဘွဲ့ရပြီးနောက် အလုပ်ဝင်ချိန် ၁၉၇၀ ၇၁ လောက်စပြီး တစ်ကြိုမေးခွန်းတွေနဲ့ ကျူရှင် ခေတ်စားလာကြပါတယ်။ တစ်ကြိုလို့သာဆိုတယ်၊ ဘယ်သူနဲ့ ဘယ်လို ပေါင်းစား၊ ဘယ်သူ့သားသမီးဆီက ဘယ်လိုမေးခွန်းရကြ ပြီး ဂုဏ်ထူးဆိုတာ အပေါစားဖြစ်လာပါတယ်။ တတ်သလားမေးရင် ဖြေပြီးတာနဲ့ ဘာမှ မသိကြတော့ပါဘူး။

ကွန်မင့်တခု =ကျွန်တော်ရော ကျွန်တော့်သမီးပါ မြန်မာစာ ဂုဏ်ထူးထွက်ပါတယ် ကျွန်တော်က စိတ်ကြိုက်မြန်မာစာ ဂုဏ်ထူး သမီးက မြန်မာစာ ဂုဏ်ထူး

ကွန်မင့်တခု =သမီးကြီးဆယ်တန်းမှာ မြန်မာစာကလွဲရင်အားလုံးဘာသာဂုဏ်ထူးထွက် ရူပဗေဒ ၉၇မှတ်ရ။

(၁)

ကွန်မင့်တူတွေကို စုထားတာသာဖြစ်ပါတယ်။

တချို့တော့ တကယ်တော်ကြပါလိမ့်မယ်။

ကျွန်တော်တို့ဆယ်တန်းအောင်တဲ့ မုံရွာ၊ စတိတ်တူးကျောင်းကနေ မောင်သိန်းနိုင်က မြန်မာစာဂုဏ်ထူးရတယ်။ တပြည်လုံးမှာ သူတယောက်ဘဲရတာ။ နောက်တော့ ဂုဏ်ထူးဦးသိန်းနိုင်ဖြစ်လာပါတယ်။ ကွယ်လွန်တာ မကြာလှသေးပါ။

သူက မြန်မာစာ တကယ်တော်တာ။

(၂)

အခုကတော့ "တစ်ကယ်" ခေတ်။

"တစ်ကယ်" လို့ ရေးမှလည်း "တစ်"သက်တာ စာပေဆု ရတဲ့ခေတ်။

ဆရာအောင်သင်းက "တသက်တာစာပေဆု" နောက်ဆုံးရတဲ့ပုဂ္ဂိုလ်။

(၃)

တွေ ကို တေ၊ ဖြစ် ကို ဖစ် လို့ရေးသူတယောက်ကို ပြင်ပေးတော့ သမီးက မြန်မာစာဂုဏ်ထူးရထားတာတဲ့။

သူလို ကျောင်းသူတွေကို ဂုဏ်ထားပေးတဲ့ ပါမောက္ခတွေကလည်း

မှာ ကို မာ

ပါပြီ ကို ပါပီ

သေ ကို -သ

သတ် ကို -တ်

လို့ ရေးကြလိမ့်မယ်ထင်တယ်။

"မန်မာပီ" က "မန်မာစာ"

(၄)

ကျပ်ငွေတန်ဖိုးနဲ့ ဂုဏ်ထူးအရေအတွက် တိုက်ရိုက်အချိုးကျသလား မသိ။ သုတေသနလုပ်မှာသာ မှန်လိမ့်မယ်။

ဂုဏ်ထူးအစစ်နဲ့ ထိုက်တန်တဲ့ မြန်မာစာ အသက်ရှည်ပါစေသတည်း။

ဒေါက်တာတင့်ဆွေ