ပါပီ ဖစ် ပီသ

(ရရစ် မပါတဲ့ ကီးဘုတ် အညံ့စားသုံးနေရသူများသို့)

မြန်မာစာဆိုတာ ပါးစပ်ကထွက်တဲ့အသံမပြီသရင်လည်း ရေးတဲ့အခါလွဲတတ်ပါတယ် ဒါနဲ့ ပီပီသသ နဲ့ ပြီပြီသသ ဘယ်ဟာက အမှန်လဲ ခင်ဗျား

ပြန်စာ

ပြီ

ပြီ – စည်း / ပျီ / ၁၊ ဖြစ်ပျက် ပြုလုပ်မှုပြီးကြောင်း ဖော်ပြသော စကားလုံး။ "သူသွား ပြီ၊ မလိုက်နှင့်တော့။" ၂၊ ပိုင်းဖြတ်ခြင်းပြ နောက်ဆက်စကား။ (ပဋိသေဓကြိယာနှင့်သာ အသုံးများသည်) "နေ့အခါ ညဉ့်အခါဟူ၍ မရှိပြီ။" လောကုပ်၊ ၉။

ပြီ – ကြိ / ပျီ / [ပေါ] တပြိုင်တည်း တညီတည်း ယှဉ်တွဲပြုလုပ်သည်။ တပြိုင်တည်း။ တယှဉ်တည်း။ "လုလင်တို့၊ ပြိုင်တူ လှော်ချီ၊ လှေချင်းပြီသို့၊ တညီတည်းပင်။" ကိုး* ၁၉၉။

ပြီး

ပြီး – စည်း / ပျီး / ပြုလုပ် ဖြစ်ပျက်ခြင်း ထမြောက်ကျော်လွန်ခဲ့သည်ကို ထင်ရှားစေသော စကားလုံး။

– ကြိ / ပျီး / ၁၊ တစုံတရာ ဆောင်ရွက်မှု ကျေကုန်ပြတ်စဲသည်။ "ရန်မီး၏ အရေးတော် ပြီးပါစိမ့်မည်ဘုရား။" ကော၊ ၉။ ၂၊ သိဒ္ဓိတန်ခိုးပြည့်စုံသည်။ ခံနိုင်ရည် အစွမ်းရှိထားရင်းဖြစ်သည်။ (ဓားပြီး၊ တုတ်ပြီး၊ သေနတ်ပြီး စသည် အသုံးရှိသည်။) ၃၊ အရာဝတ္ထုတမျိုးတည်းနှင့် လုပ်ထားသည်။ "ရွှေနှင့် ပြီးသော ပြာသာဒ်။"

ပြီးကပစ် – ကြိဝိ / ပျီးကဂျစ် / သပ်ရပ်သေချာခြင်း မရှိပဲ၊ ပစ်စလက်ခတ်။

ပြီးငြိမ်း – ကြိ / ပျီးညိန်း / တစုံတခုသော အခက်အခဲ၊ မှုခင်း၊ ပြဿနာ စသည် ပြတ်စဲ အသေတ်သည်။ အဆုံးသို့ရောက်သည်။

ပြီးလွယ် – ကြိဝိ / ပျီးလွယ် / ပေါ့ပေါ့ဆဆ။ လေးနက်ခြင်း မရှိ ပြုလုပ်ကာမျှဖြင့်။

ပြီးစလွယ် - ကြိဝိ / ပျီးဇလွယ် / ပေါ့ပေါ့ဆဆ။ လေးနက်ခြင်း မရှိ။ ပြုကာမျှဖြင့်။

ဓားပြီး။

တုတ်ပြီး။

သေနတ်ပြီး။

ပြီးကပစ်။

ပစ်စလက်ခတ်။

ပြီးစလွယ်။

ပြီးစီး။

ပြီးဆုံး။

ပြီးဆေး။

ပြီးပြည့်စုံ။

ပြီးမြောက်။

ပြီးပြီးပျောက်ပျောက်။

ပြီးပြေ။

ပီသ – နဝိ / ပိသှာ့ / ၁၊ အရည်အချင်း ပြည့်ဝသော။ ရှိသင့်သော အရည်အချင်းနှင့် ကိုက်ညီသော။ ၂၊ ထင်ရှား ပြတ်သားသော။ ၃၊ သရုပ်တူသော။ ၄၊ အသံပြည်မီ ထင်ရှားသော။

ဒေါက်တာတင့်ဆွေ