ပြန်စာ
ရွှေဥဒေါင်းရဲ့ "တသက်တာမှတ်တမ်းနှင့် အတွေးအခေါ်များ" စာအုပ် အဦးဆုံး အပိုဒ်မှာ ရေးသားထားတဲံ မူရင်းစကားလုံး "အလျင်" သည်သာ မူရင်းစာရေးသူ၏ စာရေးဟန်နှင့် မြန်မာစာအသုံးအနှုန်းအရ အမှန် ဖြစ်ပါတယ်။
စာအုပ်အမည်ကလည်း "တသက်တာမှတ်တမ်းနှင့် အတွေးအခေါ်များ"။ ပြင်ထုတ်တွေ အကုန်မှားတယ်။ မလုပ်ကောင်းပါ။
၁။ မူရင်းစာအုပ်ပါ အသုံးပြုပုံ
ဆရာကြီး ရွှေဥဒေါင်း၏ တသက်တာမှတ်တမ်းနှင့် အတွေးအခေါ်များစာအုပ် ပထမဆုံးအပိုဒ် မူရင်းအတိုင်းမှာ အောက်ပါအတိုင်း ဖြစ်ပါသည်။
"ဆရာကြီး ပီမိုးနင်း၏ ဖြစ်တော်ပေါင်းကို ဖတ်ရသောအခါ၌လည်းကောင်း၊ မြင်းခြံမြို့ဆရာတောက်၏ ဘဝမှတ်တမ်းကို ဖတ်ရသောအခါ၌လည်းကောင်း၊ ငါသည်လည်း ဤကဲ့သို့သော ဘဝမှတ်တမ်းမျိုးကို ရေးလျှင် ကောင်းလိမ့်မည်ဟု အလျင်ကပင် စိတ်ကူးမိခဲ့ဖူးလေသည်။"
၂။ "အလျင်" နှင့် "အရင်" အသုံးအနှုန်း ကွဲပြားချက်
အလျင် (အမှန်):
အဓိပ္ပာယ်: မတိုင်မီ၊ ရှေးမဆွက၊ ယခင်က၊ လျင်မြန်စွာ။
သုံးစွဲပုံ: "အလျင်က"၊ "အလျင်အတိုင်း"၊ "အလျင်လိုသည်" စသဖြင့် အချိန်မတိုင်မီ သို့မဟုတ် ယခင်ကဖြစ်ကြောင်းကို ဖော်ပြရာတွင် "အလျင်" ဟု ရေးထုံးပြုကြပါသည်။ မြန်မာစာအဖွဲ့၏ မြန်မာစာလုံးပေါင်းသတ်ပုံကျမ်းတွင်လည်း "ယခင်/ရှေးမဆွ" ဟူသော အဓိပ္ပာယ်အတွက် "အလျင်" ကို သုံးရန် ပြဋ္ဌာန်းထားပါသည်။
အရင် (အသုံးများလာသော အပြောစကား):
အဓိပ္ပာယ်: ပထမ၊ ဦးစွာ၊ ရှေ့က။
သုံးစွဲပုံ: စကားပြောရာတွင် "အလျင်" ကို "အရင်" ဟု အသံထွက်လေ့ရှိရာမှ စာရေးရာတွင်ပါ "အရင်" ဟု မှားယွင်းကာ ကူးစက်သုံးစွဲလာကြခြင်း ဖြစ်ပါသည်။ (ဥပမာ - "သူ့ကို အရင်ပေးပါ"၊ "အရင်တုန်းက")
၃။ ဘာကြောင့် နောက်ပိုင်းထုတ်များတွင် "အရင်" ဖြစ်သွားသနည်း
အဟောင်းများကို ပြန်လည်ရိုက်နှိပ်ရာတွင် အချို့သော စာပြင်/အဖွဲ့အစည်းများသည် ခေတ်ပေါ် အပြောစကား အသုံးအနှုန်းအတိုင်း သို့မဟုတ် မြန်မာစာသတ်ပုံ ပြင်ဆင်ချက်အချို့ကို သမားရိုးကျ လိုက်ပြင်ရာမှ စာရေးသူ၏ မူရင်းစတိုင်နှင့် အနက်အဓိပ္ပာယ်ကို ထိခိုက်၍ "အရင်" ဟု ပြင်ဆင်လိုက်ကြခြင်း ဖြစ်ပါသည်။
နဂိုစာရေးသူ၏ အနက်အတိုင်းဆိုလျှင် -
ရှေးမဆွကပင် / ယခင်ကတည်းက စိတ်ကူးမိခဲ့ဖူးသည်ဟု အဓိပ္ပာယ်ရသဖြင့် "အလျင်" ဟု သုံးစွဲခြင်းက စာရေးသူ၏ မူရင်းအသုံးအနှုန်းဖြစ်သည့်အပြင် မြန်မာစာအသုံးအနှုန်းအရလည်း ပိုမိုတိကျ အမှန်ကန်ဆုံး ဖြစ်ပါသည်။
မူရင်းစာတွေ၊ ကဗျာတွေသာမက တရားစာတွေကိုပါ ထင်သလို မပြင်ကောင်းပါ။ မပြင်ရပါ။ မပြင်သင့်ပါ။
ဒေါက်တာတင့်ဆွေ
Comments
Post a Comment