စေ့

ဆရာ မင်္ဂလာပါခင်ဗျား  စေ့စစ် တယ်လို့ရေးရင်မှန်ပါသလားဆရာ မြန်မာစာ အဘိဓာန် မှာတော့ စေ့စစ် ဆိုတာ မတွေ့ရလို့ပါ ဆရာ စေ့စပ်သေချာ လား စေ့စစ်သေချာလား ခင်ဗျား

ပြန်စာ

မြန်မာအဘိဓာန် အကျဉ်းချုပ်ထဲမှာ စေ့စစ် လို့ မပါ။

စကားအရာမှာတော့ -

ဆရာသည် ကျောင်းသားတွေကို စေ့အောင် (လူတိုင်းစေ့) စစ်တယ်။

စေ့

စေ့¹ – [ကြိ] / စေ့ / စီ / ၁။ အရေအတွက် ပြည့်စုံသည်။ “ရှင်မသားကို၊ ထင်ရှားမတွေ့၊ ယခုနေ့လျှင်၊ စေ့၏တလ၊ ကြာမြင့်စွာ။” ဘူလင် ၂၆၀။ ၂။ အကြွင်းအလပ် မရှိ။ “အိမ်ပေါက် စေ့ လိုက်ရောင်းစားပေါ့။” ငါးဦး။ ၃၃။ ၃။ (သတ်မှတ်သောအချိန်သို့) ရောက်သည်။ “အခါစေ့က၊ အောင်မြေ မှန်ရဲ၊ ဘွားကုန်းမြေသို့။” ပါမီ* ၄၃။ ၄။ အကြားအလပ်မရှိ ထိပ်သည်။ ယင်းသို့ ထိပ်စေသည်။ “မစေ့*ဟောင်းလင်း၊ လူခံတွင်းတွင်၊ ကျင်းကျင်းကျံကျံ၊ ချီးမွမ်းသံတည့်။” ပါမီ* ၁၅၅။ “တံခါးကိုမူ စေ့ထားလေသည်။” မိုးရိပ်။ ၄၂။ ၅။ စေ့စပ်သည်။

– [ကြိဝိ] / စေ့ / စီ / သေချာစွာ။

စေ့² – [န] / စေ့ / စီ / ၁။ သစ်သီးထဲရှိ မျိုးလောင်းဖြစ်သော အဆန်။ အစေ့။ ၂။ ယင်းအစေ့နှင့် သဏ္ဌာန်တူသော အရာမျိုး။ “စပါးတလုံး၊ ဆန်တစေ့မျှသော်လည်းကောင်း မသွင်းရအောင် စီရင်တော်မူ၏။” ကုလား၊ ဒု၊ ၂၀၂။ “မတ်စေ့ ကျပ်စေ့၊ မလေ့သောင်းပြောင်း၊ ရုပ်ပေါင်းထူးထွေ၊ ရွှေငွေ ပြားရွက်။” ကုသ* ၁၆၆။ ၃။ အန်ခတ်ကစားရသော အဆန်။ အန်စာ။ “မငြီးမငွေ့၊ အန်မှာစေ့၊ ခတ်၍တလေလေ။” ကဝိသတ်* ၁၆၅။

စေ့³ – [စည်း] / စေ့ / စီ / ဝန်ခံခြင်း၊ တိုက်တွန်းခြင်း၊ တောင်းတခြင်း စသည်တို့ကို ဖော်ပြရာတွင် ကြိယာနှင့်တွဲဖက်သုံးသော စကားလုံး။ (စေ့နှင့် အသုံးတူသည်။) “ပြန်ရပါစေ့မယ်။” မယ်ဖြူ။ ၄၆။

စေ့ – န / စေ့ / ဆင်ကို ခေါ်ရာတွင် သုံးရသော စကားလုံး။

“ဆင်မှာကားစေ့၊ ဝက်မှာလေ့၊ ခေါ်၍ကျွေးမွေးပေး။” ကဝိသတ်* ၁၅၄။

စေ့ကောက် – ကြိ / စေ့ဂေါက် / စိဂေါက် / သစ်သားစရွေးတံ ပြုလုပ်သည်။ စိကောက်သည်။

စေ့ကောက်လွှ – န / စေ့ဂေါက်လွှ / စရွေးလုပ်ရာတွင် အသုံးပြုသော လွှ။

စေ့ငှ – ကြိ / စေ့ငှ / ပြည့်စုံသည်။ နှံ့စပ်သည်။ စုံလင်သည်။ အကြွင်းအလပ် မရှိ။ “စေ့အောင်ဝယ်လို့၊ လှူစမ်းပါ။” မှူ၊ ပ။ ၁၄၁။

စေ့ငှ – ကြိ / စေ့ငှ / ၁၊ [ပေါ] စဉ်းစားသည်။ ဆင်ခြင်သည်။

၂၊ သိရအောင် ကြိုးစားသည်။ “မြန်မာ့အမှူ၊ မှတ်တခုဖြင့်၊ စေ့ငှရှာဖွေ၊ ရတတ်စေလော။” သံ* ၁၅၅။

၃၊ ပြည့်စုံသည်။ သေချာသည်။ တိကျသည်။ “ကောင်းစွာရှာဖွေ ကြည့်ရှုစေ့ငှပြီးလျှင်။” သင်နည်း။ ၁ဂ၄။

စေ့စေ့ – ကြိဝိ / စေ့စေ့ / စိစိ / အပြည့်အစုံ။ အကြွင်းမရှိပဲ။ သေသေချာချာ။ “ဤအရာကိုလည်း စေ့စေ့နှလုံးသွင်း၍ မိန့်တော်မူပါ။” သမန်း၊ ပ။ ၂၅၅။

စေ့စေ့ကြည့် – ကြိ / စေ့စေ့ကျိ / စိစိကျိ / သေသေချာချာ ရှုကြည့်သည်။

စေ့စပ် – ကြိ / စေ့ဇတ် / ၁၊ သဘောတူညီချက် ကျေအေးချက် ရရှိရန် တိုင်ပင်ဆွေးနွေး ဆက်သွယ်သည်။ “ပြည်တွင်းစစ် လမ်းစဉ်ကိုလိုက်နေတဲ့ ကွန်မြူနစ်ခေါင်းဆောင်တွေကို အစိုးရ ကခေါ်ပြီး စေ့စပ်ပါအုံး။” ဝဲလမ်း။ ၄။ ၂၊ ယောက်ျား မိန်းမတို့ မင်္ဂလာဆောင်ရန်အတွက် စကားအဆက်အသွယ် အစီအစဉ် လုပ်သည်။ ကြောင်းလမ်းသည်။ မြန်းသည်။ “မောင်သီဟနှင့်...အေးရင်တို့ လူကြီးချင်း စေ့စပ်လိုက်ကြပြီး။” မိုးမြေ။ ၁၇၃။ ၃၊ ယှဉ်တွဲသည်။ ပေါင်းဖက်သည်။ “အသက်မသင့်၊ မတင့်မအပ်၊ စေ့စပ်ဘယ်သို့၊ ပြုချေမြို့အံ့။” ဘူလင်* ၁၃၂။ ၄၊ သိပ်သည်းသည်။ ကျနသည်။ သေချာသည်။ “မြို့မည်သည်ကား...အင်္ဂတေအတိလည်း ချောမေ့ စေ့စပ်စွာ၏။” ရာကျော်။ ၂၅။ ၅၊ အမှုကိုစုံကို ညှိနှိုင်း ဆောင်ရွက်သည်။ “အမြန်သွား မီးရထားနှင့် လိုက်ရအောင် စေ့စပ်ပါ။” ပြင်သစ်မှတ်။ ၃ဂ။

စေ့စပ်ရေး – န / စေ့ဇတ်ယေး / သဘောတူညီချက် ကျေအေးချက် ရရှိရန် တိုင်ပင်ဆွေးနွေး ဆက်သွယ်ခြင်း။ “ငြိမ်းချမ်းရေးကိုသာ လိုလားပါသည်။ စေ့စပ်ရေး လုပ်လိုပါသည်။” နစ်ကျော်။ ၃။

စေ့ဆော် – ကြိ / စေ့ဆော် / ၁၊ အားပေးသည်။ တိုက်တွန်းသည်။ “မင်းကြီး။ စေတနာသည် စေ့ဆော်ခြင်းလက္ခဏာ ရှိ၏။” မိလိန့်။ ၉၅။ ၂၊ အားထုတ်သည်။ ကြိုးစားသည်။ “တအောက်မေ့မေ့ ညည့်နေ့ကြိုးစား၊ စေ့ဆော်ငြားလည်း.... ဈာန်မရမည် စိပ်စိပ်မထင်။” သံ* ၁။

စေ့မြေ့ – ကြိ / စေ့မျေ့ / ၁၊ သေချာကျနသည်။ သေသပ်သပ်ရှိသည်။ “အိမ်ထောင်ပစ္စည်း၊ ဆည်းသမျှကို၊ စေ့မြေ့သေဝတ်၊ စောင့်ရှောက်တတ်၏။” ကိုး* ၁၅၀။ “ကုန်သည် သားလျှင်၊ သိုထားပစ္စည်း၊ သိမ်းဆည်းစေ့မြေ့၊ ထုတ်၍ ရှုံးစု၊ ကုန်ရင်းပြုလျှက်။” ရာသီ* ၁၆။ ၂၊ ပီပီပြင်ပြင်ရှိသည်။ “မြို့သူမလေး၊ စေ့မြေ့ဟန်ပန်း၊ ဆင်းနတ်ကြန်းနှင့်။” ကုသ* ၅။

စေ့ရွက် – န / စေ့ယွက် / စိယွက် / သစ်စေ့မှထွက်သော အပင်ငယ်တွင် ပထမဆုံးဖြစ်သောအဓိကရွက်။

ဒေါက်တာတင့်ဆွေ