နိုင်ငံရေး သင်ပုန်းကြီး

တင်ထားတဲ့စာ = ပုံတောင်ခြေက စေတီ

ကွန်မင့်တခု = ကျွန်းပင်ဝါးပင်တွေတော့ ခုထိစိမ်းစိမ်းစိုစိုရှိနေပါတယ်ဆရာ လမ်းခရီးကတော့ ပုလဲ မင်းတိုင်ပင်လမ်းကြောင်းက သွားမရတော့ပါ။

မှတ်ချက်စာ = ဆင်သွား လမ်းဖြစ်။ 

နိုင်ငံရေး ငါးပါးမှောက် လူသွားလမ်းပျောက်။

ကျွန်တော်က ချင်းတွင်းမြစ်အနောက်ဖက်မှာရှိကြတဲ့

ပုလဲနယ်နဲ့ ပုလဲနဲ့ဆက်စပ်နေတဲ့ ယင်းမာပင်၊ ဆားလင်းကြီး။ ဆက်သွားရင် ရေစကြို၊ မြိုင်၊ ပခုက္ကူ။

အနောက်ဖက်ဆက်သွားရင် ယောနဲ့ ဂန့်ဂေါ စတဲ့နေရာဒေသတွေကို ကောင်းကောင်းသိပါတယ်။

အမျိုးတွေ၊ မိတ်ဆွေတွေ၊ လူနာတွေနဲ့ ၁၉၉၀ တုန်းက မဲပေးခဲ့ကြသူတွေ။

၂၀၁၂၊ ၂၀၁၅၊ ၂၀၂၀ အထိလည်း အဆက်အသွယ် ကောင်းပါတယ်။

၂၀၂၁ ကစပြီးတော့လည်း မြေပြင်အခြေအနေတွေကို လက်လှမ်းမီတယ်။

သိချင်တာရှိ လှမ်းခေါ်လို့လည်း ရတယ်။ စိတ်ချရသူတွေ များတယ်။

ပုလဲနဲ့ ထိစပ်နေတဲ့နေရာက သတင်းတွေ အမျိုးမျိုးတင်နေကြတယ်။ တချို့ အတော်များများက မမှန်ပါ။

လာလာပြောကြတယ်။ ပုလဲနဲ့ ယင်းမာပင်မှာ ဘာတွေဖြစ်နေပြီတဲ့။

ကျွန်တော့်မူက နိုင်ငံရေးမှာ သိတိုင်းလည်း မပြောရပါ။

ခေတ်ကတော့ မှန်မှန် မှားမှား အပြောသမား၊ အပြောများတာကို သဘောကျနေကြတယ်။

အပြောကောင်းသူတွေက သူရဲကောင်း။ 

အဖြေကောင်းသူတွေက အာဇာနည်။ 

လှည့်ပတ်ပြီး စွာတာတာ ချွဲတဲတဲ ပြောတတ်သူတွေက ဆဲလီ ခေတ်။

သတင်းလုပ်လို့တော့ ကောင်းပါရဲ့ နိုင်ငံရေးလုပ်တော့ ကမောက်ကမဖြစ်စေတယ်။

၅ နှစ်လောက်ကြာတော့ သဘောပေါက်လာသူ နည်းနည်းတော့ ရှိလာပုံရတယ်။

ဘယ်အရာကိုမဆို အခြေခံကျတာ၊ မြေပြင်နဲ့ထိစပ်နေတာကသာ အဖြစ်မှန်နဲ့ နီးစပ်တယ်။

ပညာနဲ့ စာလည်း အတူတူဘဲ။ သူငယ်တန်းစာမကျေဘဲ မိုးပြောလေပြော၊ ရသပြော၊ မော်ဒန်ပြော၊ ဟိုက်ပါပြော။

နိုင်ငံရေးမှာပါ သင်ပုန်းကြီးကျေညက်ရပါမယ်။

ကျောက်သင်ပုန်းခေတ်ကနေ အိုင်ဖုန်းခေတ်။ နည်းပညာတော့ တိုးတက်ကောင်းမွန် မြန်ဆန်လာပါရဲ့ ကျောက်တံနဲ့ မြေဖြူတံတွေ ကျိုးကုန်ပြီ။

ဒေါက်တာတင့်ဆွေ