သည်မြိုင်ချောင်
ဇောတမောင် ပျော်စံပယ်တဲ့
ယာကိုးပယ် ခင်း။ ။
ရဲစိတ်ကယ်ဝင်
ဗိုလ်ထောင်တင် ရွှေလေးနှင့်
ရန်ဘေး ကုန်အောင်ထွင်ချည့်
ဆဒ္ဒန်ဆင် ရန်သူထွက်စေတော့
မြားစက်နှင့် ခွင်း။ ။
အိုဟဲ့ ဟရို…
ခွေးနီပါးနဲ့ ရဲကျားရို့
ကြန်စုံမရို့ ဂုတ်မရို့ ……!
နင်တို့သခင်၊ ဇေတမည်ရှိ
စွမ်းသတ္တိနှင့်၊ လေးကြီးရှင်မှာ
ခုပင် ယနေ့၊ အခင်းတွေ့ပြီ။ ။
ရှေ့တပ်ဦးခင်း၊ တင်းတင်းမာခေါင်
စွယ်ရောင်ဖွေးဖွေး၊ လျှမ်းလျှမ်းပြေးသော
ခွေးနီပါးနှင့် ခွေးအောင်နက်တို့က
(ရှေ့တပ်ဦးက၊ မင်းရဲလှနှင့်
ကုပ်ကျားမ,သမက်၊ ခွေးအောင်နက်တို့က- မူကွဲ)
မကန်းကွက် စစ်ဆင်လို့
တပ်လုလင် ခွေးမိုးမှောင်က
တကောင်နဲ့တကောင်ကို
နံဘေးချင်း မြှောင်လို့ မို့
အယ်အောင်ကြီး မပူးမကပ်စေနှင့်
တပ်ဦးက ချီတက်စေ။ ။
တောခွေးနှင့် သားကျသည့်
မိကြောင်မတူ ခွေးလက်ဖြူနဲ့
အရေတူရွေး၍
ဗိုလ်တပ်ရေး နှစ်ကောင်ခန့်။ ။
နန့်တန့်တန့် ရှန့်တန့်တန့်
တခုလပ် ခွေးမများကို
ကုပ်ကျားနဲ့ ရဲတော်က
ကတော်စု အရေးပိုင်
ကြပ်တည်းစွာ ချုပ်ကိုင်၍
ဝမ်းလှိုဏ်က လိုက်ကြစေ။ ။
စစ်ခြေယွင်းချော်
မတော်လို့ သူ့တပ်
ဆုတ်ကပြီမှတ်ကာမှ (အခြေပြတ်ကာမှ-ကွဲ)
တခုလပ် ခွေးမသင်းတို့ကို
တပ်တွင်းက လွှတ်၍
ရွပ်ရွပ် ချွံချွံ
လိုက်လံ ကိုက်ခဲစေရမည်။ ။
မြီးတံ သော့သော့ (မြီးတံ ဆော့ဆော့)
ခါးကော့ကော့နဲ့
ဘော်ကြော့ လွင်လွင်
ခွေးထီးကို မြင်တဲ့လျှင်
ခင်ခင် မက်မက်
နှုတ် မဆက်ဘူးလို့
ကြည့်ချက်ကယ် သိမ်မွေ့
ပြုံးကာစွေ့ လိုက်သည့်
ဣန္ဒြေရှင် ခွေးအပျိုစင်များမှာ
ငလွင် ငပြင်သို့
ထွက်ဝင်လွန်ကြူး
တပ်ဦး တပ်ဖျား
မသွား မလာစေနှင့်။ ။
ရန်မွှေနဲ့ ရဲခေါင်
ခွေးကွက်ချော နှစ်ကောင်က
လျော်ကန်အောင် နေရာချလို့
တပ်မက မြဲစွဲစေ။ ။
ကိုယ် ခပ်ကုပ်ကုပ်
မြီးဖုတ် သွန်းသွန်း ဖင်ချွန်းချွန်းနဲ့
ဝမ်းက လျလျ၊ ရင်ဝ ကျယ်ကျယ်
ကပ်ပယ်အိတ် ပြောင်ပြောင်
စွယ်ရောင် ဖွေးဖွေး
မကွပ်သေးတဲ့
ခွေး လူပျိုသိုး
ကျားထက်ဆိုး တို့ပေါ်မှာ
ပဲခူး ဒလ၊ အောက်ပြည်က ရခဲ့တဲ့
ဝဲထူမ ဦးရီး၊ အောင်နက်ကြီးကို
အပြီးလက်မှတ်၊ စစ်ကဲစာ ပေးအပ်၍
တပ်မတော် လက်ျာက
ရန်လာလျှင် ရှောင်မိအောင်
ဂဠုန်တောင်မြဲ စွဲလေ။ ။
စစ်ခြေယွင်းမှတ်
ကွပ်ညှပ်မူရာ
ရှောင်ခွာ ပြေးပုန်း
တလုံး ကြွင်းကျန်
ဝတ်ဆန် မကုန်၊
မှန်နှင့် သွတ်သွတ်
နတ်ကွတ် သိုးကြောင်
ပေါင် ခပ်ကွကွ
ဆီးစ တခို
မိုမို စုစု အဖုအလုံး
တင်ကုန်း ကျောက်လျှော
သိုကြောမပြတ် မစင်တတ်တဲ့
တပတ်ရစ် ခွေးများကို
နီပါးနဲ့ ရန်လို၊ သန်းခေါင်ဗိုလ်တို့ကို
ဆင့်ဆိုစည်းကြပ် တပ်မှူးအပ်၍
တပ်မတော် လက်ဝဲက
ဂဠုန်တောင်စွဲမြဲ စွဲစေ။ ။
လင်သေ လင်ကွာ
နေရာ မကျ
မုဆိုးမ ခွေးမအို
မုဆိုးဖို ခွေးသက်ကျား
စွယ်သွား မချွန်၊ အရွယ်လွန်နဲ့
ကိုယ်ဝန်ဆောင် တချို့
နို့စို့ ကြီးငယ်၊ ခွေးမီးယပ်သည်များမှာ
တနယ်တရွာ တပ်ချီရာသို့
မပါမလိုက်ကြစေနှင့်။ ။
အိမ်ဝ အိမ်နောက်
ခြံပေါက် ခြံတွင်း
ထမင်းအိုးစင် ဟင်းအိုးစင်နှင့်
ယုန်ကင် ကြွက်ပေါင်
ချိုးကောင်ထားရာ
ဘဏ္ဍာတော်များမှာ
မတိမ်း မပါးစေရအောင်
ချပ်ပြားလုံးရေ
အသေအချာ လက်မှတ်စာနှင့်
ခွေးနီလာ ခွေးကျားတို့ကို
တဗိုလ်လျှင် အချုပ်
သိမ်းအုပ်စိုး ယူစေ၍
တအုပ် တစည်း
သိမ်းဆည်း စိတ်တူ
ဖြူဖြူ ဖြောင့်ဖြောင့်
ရန်မနှောင့်ကြရအောင်
အိမ်စောင့်ဘို့လေ နေရစ်စေ။ ။ စလေဦးပုည)
(မူကွဲ အလွန်များ၏။)
#ရှေးစာကဗျာများ ကျေးဇူး။
မှတ်ချက်
ဦးပုညသည် ယနေ့ခေတ်မှာ "ပါပြီ" ကို "ပါပီ" ဟုရေးနေသူများအကြောင်း သိသွားပါ။
ဒေါက်တာတင့်ဆွေ
Comments
Post a Comment