ဒီစာမှာ လူ ၂ ဦးတည်းကိုသာ နမူနာပြပါမယ်။
တယောက်က လန်ဒန်မှာ။ နောက်တယောက်က ဘာလင်မှာ။
တခြားတိုင်းပြည်တွေကလည်း ရှိသေးတယ်။
ရုရှား၊ အမေရိကား။
သူတို့က ပြန်မာစာနဲ့ တိုင်းတပါးက သုတတွေကို စိတ်ဝင်စားကြတယ်။
ယနေ့ခေတ် မြန်မာစာ စာလုံးပေါင်း၊ သတ်ပုံ၊ အသုံးတွေကိုသာမက ဘာသာပြန်အလွဲအမှားတွေကို ထောက်ပြလေ့ရှိကြတယ်။
ကျွန်တော်တို့ မြန်မာစာနဲ့ ပြောစကားအပြင် ဘာသာပြန်နဲ့ အသံထွက် လွဲမှားနေကြတာတွေ အများကြီး။
စာဖတ်သူ လူကြီးမင်းတို့ခင်ဗျား ခေတ်ဆိုတာ ပြောင်းတယ်။
ကျွန်တော်တို့ကျောင်းသားခေတ်မှာ နိုင်ငံခြားသွားရတယ်ဆိုတာ တကဲ့ကို ခက်ခဲလွန်းခဲ့ပါတယ်။
အခုတော့ -
မြန်မာပြည်ရဲ့ပြင်ပနိုင်ငံတွေမှာ နေထိုင်၊ အလုပ်လုပ်နေကြသူ မြန်မာနိုင်ငံသားပေါင်း ခန့်မှန်း ဦးရေ ၄ သန်းကနေ ၅ သန်းရှိပြီ။
တနည်းအားဖြင့် ၁၀ ယောက်မှာ ၁ ယောက် ပြည်ပမှာ။
တယောက်ယောက်လောက် နိုင်ငံခြားရောက်မနေသူမရှိတဲ့ မိသားစု မရှိသလောက် ရှားတယ်။
အဲဒါကြောင့် နိုင်ငံတကာနဲ့ ကင်းကွာလို့ မရတော့ပါ။
ကိုယ်ရေးတဲ့ အင်္ဂလိပ်စာ၊ အင်္ဂလိပ်အသံထွက်၊ ဘာသာပြန်တွေမှာ ရှေးရိုးကြီးအတိုင်း မရသင့်တော့ပါ။
မြန်မာစာအကြောင်းလေးတွေတင်ပြတဲ့အခါ -
ပုဂံခေတ်ကဟာတွေ လာမပြောနဲ့တဲ့။
ဘိုးတော်ခေတ်ကို ထားခဲ့တဲ့။
စာကိုမှန်အောင်ရေး ရှေးတဲ့။
အတော်ကို ညံ့ဖျင်းတဲ့၊ အတွေးအသိ၊ အပြောနဲ့ အရေးအသား အယူအဆတွေဖြစ်တယ်။
သူတို့က ခေတ်စာလုံးကိုတောင် မှန်အောင်မရေးတတ်ကြ။
ကျွန်တော့်အမည်ရှေ့ ဒေါက်တာ စာလုံးက ဘိုဆန်သတဲ့။
စာကို မှန်အောင်မရေးတတ်သူက ရိုင်းကြတယ်။
ဝေါဟာရတွေကို နိုင်ငံရေးလုပ်ထားတာကို သိတဲ့သူ နည်းတယ်။
ဗမာ နဲ့ မြန်မာ ရန်ဖြစ်ကြတယ်။
တ နဲ့ တစ် စစ်ဖြစ်ကြတယ်။
စာနဲ့ ပညာ ညံ့တော့ နိုင်ငံရေး၊ လူမှုရေးလည်း ညံ့တယ်။
တွေ့ဆုံဆွေးနွေးရေး၊ ငြိမ်းချမ်းရေးဆို အဟုတ်မှတ်နေကြတယ်။ ၉၆ ခါရှိပြီ။
စာဖတ်သူ လူကြီးမင်းတို့ခင်ဗျား -
မျက်စိကိုသာမက ဦးနှောက်ကိုလည်း ဖွင့်ထားကြပါ။
တီချယ် နဲ့ ဆယ်လီ လို့ရေးတတ်တာနဲ့ ကိုယ့်ကိုယ်ကို အဟုတ်ကြီးမှတ်မနေကြနဲ့။
ပါပီ နဲ့ ဖစ် လို့ရေးတတ်တာနဲ့ ခေတ်မီတယ် ထင်မနေကြနဲ့။
ရ ကို က လို့ ပြောတတ်တာနဲ့ ဆူပါ၊ မော်ဒန်၊ ရှူးရှဲအဆင့်ရှိသူလို့ အောက်မေ့မနေကြနဲ့။
ကိုယ်ရော စိတ်ပါ ကျန်းမာကြစေသတည်း။
ဒေါက်တာတင့်ဆွေ
Comments
Post a Comment