ပန်ထွေဖျော် ဋီကာ

(၁)

ပန်ထွေဖျော်စာလုံး ဘီဘီစီမှာ ပန်ဆိုတာက ငါးပါ။ ထွေဆိုတာက အထွေထွေအလီလီ။ ဖျော်ဆိုတာကတော့ ရောလိုက်တာ၊ ဖျော်လိုက်တာ၊ ပေါင်းစပ်လိုက်တာကို ပြောတာပါတဲ့။ ခရမ်းချဉ်သီးရယ်၊ ငရုတ်သီးရယ်၊ ငါးပိရယ်၊ နံနံပင်ရယ်၊ ကြက်သွန်နီရယ် မဖြစ်မနေပါရမယ်လို့ ဆိုကြသကိုးတဲ့။ ပန်ကို ငါးလို့ခေါ်တာက ပါဠိစကား။ ပါဠိလို ငါးကို ပဥ္စလို့ ခေါ်တယ်။ အင်ဒိုဥရောပ အနွယ်တွေက ပန်ဂျ လို့ ထွက်ပါတယ်။ ပန်ဆိုတာ အဲဒီ ပန်ဂျရဲ့ အတိုကောက်လို့ ဖတ်ရတယ်တဲ့။ ပါဠိအဘိဓာန်မှာ ပန္နကိုလည်း ငါးလို့ အဓိပ္ပာယ်ပေးတယ်။ ပဥ္စဂံ၊ ပဥ္စကလျာဏီ၊ ပဥ္စငါးပါး၊ ပဥ္စရူပ၊ ပဥ္စဝဂ္ဂီ၊ ပဥ္စနန္တိယကံ၊ ပဥ္စင်တူရိယ၊ ပဥ္စင်း ဥပမာတွေ ပေးထားပါတယ်။ 

(၂)

ကျွန်တော်လည်း ၅ ဂဏန်းအကြောင်း လေ့လာကြည့်ပါတယ်။

Hindi ဟင်ဒီစကားမှာ

၁ = Ek

၂ = Do

၃ = Teen

၄ = Char

၅ = Panch ပန့်ချ်လို့ အသံထွက်တယ်။

Sanskrit ဆန်းစ်ကရစ် ခေါ် သက္ကတဘာသာမှာ

၁ = ekam

၂ = dve

၃ = treeni

၄ = chatvaari

၅ = pancha (pañca) ပန်ချာလို့ အသံထွက်တယ်။

Greek ဂရိဘာသာမှာ

၁ = Ena

၂ = Dio

၃ = Tria

၄ = Tessera

၅ = Pente ပန်တေးလို့ အသံထွက်တယ်။

IUPAC numerical multiplier ဂဏန်းမြှောက်ကိန်းမှာ

၁ = mono-

၂ = di-

၃ = tri-

၄ = tetra-

၅ = penta- ပင်တာလို့ အသံထွက်တယ်။

(၃)

ပန်ထွေဖျော်ကို ဝီကီပီးဒီးယားမှာ ခရမ်းချဉ်းသီး၊ ကြက်သွန်ဖြူ၊ ကြက်သွန်နီ၊ နံနံပင်၊ ငရုတ်သီးစိမ်းနဲ့ ဆားတဲ့။ ၆ မျိုး။ ငပိအစား ဆားလို့ရေးထားတယ်။

(၄)

ဒီနေ့ညစာ ပန်ထွေဖျော်နဲ့ စားပါတယ်။ ပဲတောင့်ရှည်ခေါ် တိုင်ထောင်ပဲ ခရမ်းရောင် ပြုတ်ပြီး သုပ်တယ်။ ကြက်ဥချေကြော်။ ဓါတ်ပုံမရိုက်အားပါ။ စားနေလို့။ 

ပုံကို ဂူဂယ်လ် ကနေယူပါတယ်။ ကျေးဇူး။

ဒီနေ့ညစာ ပန်ထွေဖျော်က အညာနည်းအတိုင်း။

၁။ ခရမ်းချဉ်းသီးကို မီးကင်တဲ့နည်းက အမှန်ဆုံး။ မီးဖိုနေအိမ်အခြေအနေမရ တချို့ကပြုတ်တယ်။ ကနေ့ မိုက်ခရိုဝေ့ဖ်မှာ အပူပေးသတဲ့။

၂။ ငပိပါတယ်။ တချို့က ငန်ပြာရည်(ငံပြာရည်)။ ငပိကောင်းမှသာ ပန်ထွေဖျော်ကောင်းတယ်။

၃။ ကျွန်တော်ကတော့ ဆီစိမ်းလေးနည်းနည်းတော့ပါမှ။ 

၄။ ငရုတ်သီးလည်း အခြောက် အကြမ်းမှုန့် ရော။ 

၅။ အစိုရော ပါချင်သေးတာ။ ခပ်သေးသေးကိုက်ထည့်။

၆။ နံနံပင်။ (ရှမ်းနဲ့၊ တရုပ်နံနံထည့်ရင် အနံ့ပျက်ရော)

၇။ ကြက်သွန်နီ ပါရတယ်။

၈။ ကြက်သွန်ဖြူလည်း ထည့်နိုင်တယ်။

စားကောင်းအောင်ဆိုပြီး အပိုတွေပါထည့်ရင် စားမကောင်းတော့ပါ။

ဒေါက်တာတင့်ဆွေ