တခုသော သင်္ကြန်အခါ

လာလေလေ လိုက်ခဲ့တော့

တို့စရိုက် တို့ဘာသာ

နှစ်ဆန်းခါ ပိတောက်ကြွားချိန်မို့

ကစားကာ ရေကြည်ကြည်နှင့်

ပီပေသည် ဗမာမျိုးကိုလ

တိုးဆင့်၍ ချစ်ခဲ့တာ။   ။

… လာဟေ့ လာဟေ့

    ဘုရားကုန်းက၊ တအုန်းအုန်းနဲ့၊ တရုန်းရုန်းလာကြ

    ဘယ့်နှာပါလိမ့်

    ထိန့်လိုက်တဲ့ အိုးစည်၊ နှဲကလည်း ပီသနဲ့

    သီသူက သီကြ၊ ကသူက က လာ

    နွားကြီးလည်း ပါသဟေ့

    ကျောပေါ်မှာ ကော်ဇော၊ အမွှေးရော သနပ်ခါး

    ချိုဖျားမှာ ပိတောက်ပန်းတွေက

    တလျှမ်းလျှမ်း ရွှေအဆင်

    နွားစိတ်ထဲ အခဲသား ဝင်လိုက်ရ

    ရွှင်လိုက်မည့် ဖြစ်ခြင်း…။ (စကားညှပ်)

သြော်… ဝဋ်မကင်းသူကိုဖြင့်

လွှတ်ခြင်းမှာ ဝါသနာပါတဲ့

ရွှေဗမာ သည်အမျိုးမှာလ

အကျိုး သည်လို တူလိုက်ပါ့

ရွှေမဉ္ဇူ နှုတ်ရွှေခွန်းရယ်နဲ့

သွန်းလိုက်မိပါ။   ။

… နှစ်သစ်ကူးတဲ့ တန်ခူးခါမှာ

    ဒါနက တဝေဝေ ရေတွေက တရွှဲရွှဲ

    ပျော်ပွဲက တဝင့်ဝင့် ကဲလို့သာ ဆင့်ရော့

    အရွယ်သင့် အရွယ်ငယ်

    ဗမာတွေ ထယ်လိုက်ကြ…။ (စကားညှပ်)

ဘယ်မြေဟာ စေတီပေါမယ်လဲ

ဘယ်ပြေဟာ အပျော်ကျောမယ်လဲ

စိတ်ဇော မြန်ဗမာမှာဖြင့်

သံသရာ ဂရုထားသူမို့

ပါးလိုက်ကြ ပျော်ပျော်သာ

အခါက နှစ်ဆန်း။

… လကလည်း ရွှင်လန်း

    ရွက်ဟောင်းကြွေကြွေ၊ ရွက်သစ်ကယ်ဝေ

    လေပြေက ဆန်းပြန်တော့

    လွမ်းစရာပေါ့…။ (စကားညှပ်)

ဥသြ ငယ်သာ

ပင်မြင့်မှာ သံဝါဝါနဲ့

သင်္ကြန်ခါ သူက ညှင်းပြန်တော့

မလေးမောင် သည်ရင်တွင်းဆီသို့

သီချင်း သူ ဝင်လာ၍

ဖြူစင်စွာ ဂူဆင်၍သာပ

တူယှဉ်ကာ သူရွှင်မွေ့ခဲ့ပေါ့

သြော်… ဟိုနေ့ ဟိုအခါက

ချိုကဗျာ ဧည့်သည်ကလေးတွေဖြင့်

ဖော်ရွှင်ရွှင် ဖော်ဖေမေးပါလို့

ဂူဘေးမှာ ဂူနေဖော်တဲ့

ပျော်စရာ နေဖို့ကောင်းတယ်လို့

အောင်းကြ ရွှင်လန်း။   ။ (ဇော်ဂျီ - ဂန္ထလောက။ မတ် ၁၉၃၃)

မှတ်ချက် - တခုသော သင်္ကြန်အခါသည် 'တစ်'ခုသော သင်္ကြန်အခါ မဟုတ်။ ဗမာမျိုးကိုလသည် မြန်မာမျိုးကိုလ မဟုတ်။ ဒါနကတဝေဝေ၊ ရေတွေကတရွှဲရွှဲ၊ ပျော်ပွဲကတဝင့်ဝင့်သည် ဒါနက'တစ်'ဝေဝေ၊ ရေတွေက'တစ်'ရွှဲရွှဲ၊ ပျော်ပွဲက'တစ်'ဝင့်ဝင့် မဟုတ်။

ဒေါက်တာတင့်ဆွေ