အရေး အသံ အသံထွက်

စကားပြောသလိုစာရေးနည်းဆိုပြီး ရေးကြတယ်။ သင့်မှန်တာတွေရော၊ လွဲတာတွေပါ တွေ့ရတယ်။

ရေးတော့အမှန်၊ ဖတ်တော့အသံစာလေးတွေ ၃-၄ ပုဒ်တင်ပြထားတယ်။ ထပ်ဖြည့်ပါဦးမယ်။

တနေ့က ရခိုင်ဆရာတော်တပါးကို မေးကြည့်တယ်။ ရခိုင် ကို ရခိုင်လူမျိုးတွေက ဘယ်လို အသံထွက်ကြပါသလဲဘုရား။ 

ရ သံကို ဗမာတွေထက် ခပ်လေးလေး အသံထွက်ကြတယ်။ အိန္ဒိယန်းတွေလောက်ထိတော့ အသံမလေးပါ။

တင်ပါ့ ဘုရား။

သတင်းကြေငြာတာ၊ ဈေးထဲမှာပြောဆိုတာ၊ သီချင်းဆိုတာ၊ ကဗျာရွတ်တာ နည်းနည်းစီ ကွဲပြားသေးတယ်။

သီချင်းဆိုတတ်သူတွေက အသံအကြောင်း ပိုသိကြပါတယ်။

ထိုင်းနိုင်ငံမှာ သူတို့စကားသံကို နည်းနည်းလေးကွဲလွဲထွက်မိတာနဲ့ အဆင်မပြေဖြစ်ပါတယ်။

အိန္ဒိယမှာတော့ သူတို့ကဖြည့်ပြီး နားလည်ပေးလေ့ရှိတယ်။

မြန်မာပြည်ကလူတွေ အင်္ဂလိပ်စကားပြောဆိုရာမှာလည်း တိတိကျကျထွက်နိုင်သူ နည်းတယ်။ နားလည်ယူကြလေ့ရှိတယ်။

ကနေ့ခေတ်မှာ ပြည်ပထွက်နေရသူသန်းများစွာရှိပြီ။ အင်္ဂလိပ်စကားပြောနိုင်ငံတွေကိုလည်း ရောက်ကြတယ်။ ကျွန်တော်တို့တတွေက အများအားဖြင့် ငပိသံ မပျောက်ကြပါ။ အသံထွက်မှန်အောင်ကြိုးစားသူတွေလည်း ရှိတယ်။ အဲလိုနိုင်ငံတွေမှာ မွေးဖွားကြီးပြင်ကြတဲ့ကလေးတွေကတော့ ပြောစရာမလိုအောင် အသံထွက် မှန်ကြတယ်။

လိုက် လုပ်ပါလို့ရေးကြ ပြောကြတယ်။ မမှန်ပါ။ သူများလုပ်သလို အတုယူလိုက်လုပ်တာတဲ့ တူနေတယ်။

လိုက်ခ် ဆိုရင် ခ သံလေးတော့ ပါမှ။

အသက် လိုက်ဖ် ကိုပြောရင် ဖ သံလေးနည်းနည်းပါမှ။

အာထွာဆောင်း ကို အာထွာစောင်း ဆိုရင်တော့ မှားပြီ။

ဘိုစာလုံးတွေကို မှန်အောင်မထွက်နိုင်တာထက် ပိုဆိုးတာက မြန်မာစာလုံးတွေ။

သခင်အောင်ဆန်း ကို သခင်အောင်စန်း ဆိုရင် မှားပြီ။

ဆရာ့စာတွေဖက် မရဘူးဆို မှားပြီ။

မဖတ်တက်ဘူးဆို မှားပြီ။

ဈေးသည် ကို ဈေးသယ်လို့သာ ထွက်ရတယ်။ စာနဲ့ရေးရင် ဈေးသည်။

မြန်မာသံနဲ့ ဒဂုန်တာရာ ကို တာယာ သံထွက်ပါတယ်။

စာလုံးတိုင်းမှာ အသံထွက်တွေ သတိထားကြပါတယ်။ စာတလုံးတည်းမှာ အသံထွက်မူတာမျိုးလည်း ရှိနိုင်တယ်။ 

အကြီးကြီး - အကြီးဂျီး။

ခပ်သေးသေး - ခပ်သေးဿေး။

ဆူဆူညံညံ ဆူဇူညံညံ။

တနေ့က ဆေးခန်းတခုမှာ လူဖြူသူနာပြုတယောက်က ကျွန်တော်ပြောတဲ့ အင်္ဂလိပ်ကို ချီးမွမ်းပါတယ်။ အမှန်က ကိုယ်လိုတာကို ကိုယ်တိုင် သိပါတယ်။ 

အသံထွက်မှားနေခဲ့တာတွေ မနည်းပါ။ မြန်မာပြည်မှာ သင်ယူခဲ့ရတဲ့အင်္ဂလိပ်စာမှာ လိုအပ်တာတွေရှိတယ်။ အိန္ဒိယမှာလည်း အများစုက အင်္ဂလိပ်အသံထွက် သိပ်မကောင်းကြပါ။

ကျွန်တော်တို့တတွေ အင်္ဂလိပ်စာကိုသာမကပါ။ ဘာသာရပ်မျိုးစုံကို ဖြစ်နိုင်သမျှ စစ်မှန်တာကိုသာ လေ့လာသင်ယူ၊ ရေးသား၊ ထွက်ဆိုကြရပါမယ်။

ပိုခက်နေတာက မြန်မာစာ၊ သတ်ပုံ၊ စာလုံးပေါင်း၊ အသံထွက်၊ အရေးအသား။

နားလည်ရင်ပြီးတာဘဲအဆင့်က ကျော်တက်ကြရပါမယ်။

ဒေါက်တာတင့်ဆွေ