ဘို့ နှင့် ဖို့ (၃)

"​မင်းသောက်ဘို့ကို" မှာ ဘို့ နဲ့ ဖို့ အသုံးအနှုန်းကို ကွဲကွဲပြားပြား သိချင်ပါတယ် ဆရာ.

၁။ လေညှင်းခံဘို့လား လေညှင်းခံဖို့လား ဘယ်ဟာအမှန်လဲရှင့် 

၂။ ဘို့ လား ဖို့ လားဆရာ

၃။ ဟိုတုန်းက သွားဘို့လာဘို့၊ ရွှင်အားရဘို့လို့ ရေးသားခဲ့ကြပေမယ့် အခု ရွှင်အားရဖို့လို့ ရေးကြရပြီဆရာ ဘို့ နဲ့ ဖို့ အရေးတွေလဲ ပြောင်းသွား 

၄။ ဆရာ ဖို့ နဲ့ ဘို့ အသုံးလေး တင်ပေးပါအုံးဗျ။

၅။ ဆရာရှင့် ဖို့ နဲ့ ဘို့ ကိုလည်း ဝေဝေဝါးဝါးဖြစ်နေပါတယ်။ ဆရာအချိန်အခါသင့်ရင် ပြောပါပေးပါဦး ဆရာရှင့်။

၆။ ဆရာ့အနေဖြင့် post တင်တဲ့အခါ စာလုံးပေါင်းသတ်ပုံ ဂရုစိုက်တာကို တွေ့ရပါတယ်။ အခုသိချင်တာလေး မေးခွင့်ပြုပါဦးခင်ဗျာ။ ကုသဖို့ / ကုသဘို့။ ဖို့/ဘို့ ကွဲပြားနည်းလေး သိပါရစေဆရာ။

၇။ ညရုံတော် အခြေပျက်စေဖို့ ရန်ပါးမည့် ခုအခါ၊ နှောဘို့သင့်စွာ။ ဒီမှာ ဖို့နဲ့ဘို့ဘာကြောင့် ကွဲရသလဲ မသိဘူးဆရာ။

- အဲဒီစာမှာပါတဲ့ နှောဘို့သင့်စွာဆိုတာ ပြုလုပ်ရန်သဘောပါမယ်ထင်တယ်။ သတ်ပုံစာအုပ်ဟောင်းတွေမှာ ဘို့ မပါ။ နောက်ထုတ်တွေမှာလည်း နွားဘို့တခုတည်းသာပါတယ်။

- အရင်ကလည်း ပုံနှိပ်စာတွေ၊ ကာတွန်းတွေမှာ ဖို့နဲ့ ဘို့ ရောရေးတာမျိုးလည်း ရှိခဲ့ပါတယ်။

ဘို့

ဘို့ပါတဲ့နွား

ကုလားအုတ်ဘို့

ရှင်ဘို့မယ်

ငါ့နွားတကောင် ဘို့တထောင်

ဖို့

ကိုယ့်ဖို့

ကုသိုလ်အမျိုးမျိုးတို့၏ အဖို့ဘာဂဟူသမျှတို့ကို

တဖို့ထဲဖို့နေသည်

တာဖို့သည်

ပို့အောင်ဖို့သည်

ဖို့မြေအရပ်

ဖို့မံသည်

သနပ်ခါးဖို့သည်

သူ့ကိုဖို့နေသည်

သူ့ဖို့ကိုယ့်ဖို့

အဖို့အစု

အဖို့ဝေငှ

ကောင်းမှုအဖို့ကို အမျှဝေသည်

နေ့ဖို့ညစာ

မောက်အောင်ဖို့

မြေဖို့သည်

(၁)

ကန်တော်ကြီးကို ကားနဲ့ဆို

ဘာသွားလုပ်လဲ မောင်ရေခဲ

လေညှင်းခံဘို့ ဆိုပါစို့

(၂)

'ဗမာ့'လွတ်လပ်ရေးအတွက် တပ်မတော်ဖွဲ့'ဘို့' ဂျပန်ပြည်မှာကွယ်

'တကယ်ဘဲ' အသက်နဲ့လဲလို့ ဆင်းရဲဒုက္ခခံကာ ကြံစည်တယ်

သူရဲကောင်းတဲ့ ဗိုလ်အောင်ဆန်းနဲ့ အာဇာနည်တွေရယ်

(၃)

နှစ်တရာ၊ ချစ်ရှာသင့်သူမို့၊ သစ္စာနှင့်မြွက်မယ်၊ မေတ္တာဖြင့် ပန္နက်ရွယ်တယ်၊ တသက်ဝယ်ယုံတမ်း။ ညရုံတော် အခြေပျက်စေဖို့၊ ရွှေလက်နဲ့ဆွဲကာ၊ ပွေရက်ပေ့ ပုလဲညှာရယ်၊ ကဲပါပေ့ဘုရား။ ဟုတ်သလို ပြန်မမြွက်သာဘူး၊ တုတ်တပြက် ဓားပါ၊ ရုတ်တရက် ခြားမကွာသည်၊ အနားမှာ လက်ငင်း။ သတိနဲ့ပညာကို၊ စဉ်မကွာ မှန်ထားမှ၊ ရန်ပါးမည့် ခုအခါ၊ နှောဘို့ သင့်စွာ၊ သဘောလိုက် မပြောသာသည်၊ ယောဆရာ လုပ်စမ်းချင့်လေး။ (အချုပ်တန်းဆရာဖေ) 

မှတ်ရန်

မယ်ခွေကဗျာ စာလုံးပေါင်းသတ်ပုံတွေကို ထင်သလို မပြင်ရ။

ဗမာ့သူရဲကောင်းသီချင်းပါ စာလုံးပေါင်းသတ်ပုံတွေကို ထင်သလို မပြင်ရ။

မောင်ရေခဲကဗျာပါ စာလုံးပေါင်းသတ်ပုံတွေကို ထင်သလို မပြင်ရ။

အချုပ်တန်းဆရာဖေကဗျာပါ စာလုံးပေါင်းသတ်ပုံတွေကို ထင်သလို မပြင်ရ။

ဘို့ နှင့် ဖို့ https://burmese-spelling.blogspot.com/2024/10/blog-post_635.html

ဒေါက်တာတင့်ဆွေ