ပြန်စာ
သီချင်းကဗျာစာသား
စိမ်းလဲ့ငယ်တဲ့ ညိုရောင်
ပင်ဝါးရုံ လေယူသိမ်းတယ်
ယိမ်းနွဲ့မြောက်တောင်။
မြူခိုးရယ်မှောင်
ဟိုတောင်ကြော့ ခါးပန်း။
ရွှေဥဒေါင်းငယ်တို့
မြိုင်စောင်းမှာ တွန်သံ ချိုလှတယ်
ကွန်းခိုတဲ့နန်း။ (အမည်မသိရှေးစာဆို)
မြန်မာအဘိဓာန် အကျဉ်းချုပ်
စာလုံးပေါင်းနောက်က / / ထဲမှာ အသံထွက်။
ဝါးရုံ အသက်ထွက် = ဝယုန်
ဝါးရောင်းငှက် – န / ဝယောင်းငှက် / ပေငါးထောင်ခန့် အမြင့်တွင်ရှိသော သစ်တောများတွင် အုပ်စုဖွဲ့ နေတတ်ကာ ကိုယ်အလျား ၁၃ လက်မခန့်၊ ဖက်ဖူးရောင်နှင့်အညိုရောင်ရှိပြီး ပလွေမှုတ်သံမျိုးနှင့် အော်မြည်တတ်သော ငှက်တမျိုး။
ဝါးရောင်းမှို – န / ဝယောင်းမှို / ဝါးဆွေးအုံများတွင် ပေါက်တတ်သော စားရသည့် မှိုတမျိုး။
ဝါးရုံ – န / ဝယုန် / အပင်ချင်း ထိယှက်လွှမ်းအုပ်နေသော ဝါးပင်စု။ “ကျောင်းတံခါးအဝင်၌ ကြီးစွာသော ဝါးရုံသည် ထွက်ဝင်ရာ တံခါးကို ပိတ်ဆို့လျှက် တည်သောကြောင့်”
မဇ္ဈ၊ ၂၅ဂ။
ဝါးရုံဆိုင် – န / ဝယုန်ဆိုင် / ၁၊ ပင်ခြေရှင်းလျက် အဖျားချင်း ထိယှက်နေသော ဝါးရုံပင်စု။ ၂၊ [ ဥပစာ ] ဝါးရုံဆိုင်ကဲ့သို့ အောက်ခြေရှင်းလျက် ထိပ်ချင်းထိစပ် ယှက်နွယ်နေခြင်း။ “တောင်လေတလှည့် မြောက်လေတခါ တိုက်လိုက်သဖြင့် စပါးပင်များ ဝါးရုံဆိုင် ဖြစ်ကြပေပြီ။”
ဝါးလက်ခုပ် – န / ဝါးလက်ခုတ် / ဝလက်ခုတ် / အဆစ်တခုကို အောက်ခြေထားကာ လက်နှစ်ဘက်ကိုင်သာအောင် ဖဲ့ထုတ်၍ ထိပ်လယ်မှခြမ်းပြီး လက်ခုပ်ကဲ့သို့ ရိုက်ခတ်တီးရသော စည်းလိုက်တူရိယာ။
မှတ်ရန်
စာလုံးပေါင်းသတ်ပုံ အရေးအသားနဲ့ ဖတ်တဲ့အသံ၊ သီချင်းဆိုသံတွေ ထပ်တူမကျတာတွေကို လေ့လာမှတ်သား လိုက်နာရေးသား၊ ပြောဆို၊ သီဆိုရပါမယ်။
အပြာအဆိုမှာလည်း တခါတခါတရားသေ မရတတ်ပြန်ပါ။
အသံဆိုတာ လေယူလေသိမ်း၊ ရှေ့အသံနဲ့ နောက်အသံတွေအရလည်း ကွာခြားသွားတတ်သေးတယ်။
ရိုးရိုးပြောအသံ၊ ဒေါသသံ၊ အမိန့်ပေးသံ၊ အော်ငေါက်သံ၊ တောင်းပန်ခယသံ၊ လွမ်းဆွေးစရာအသံ စတာတွေလည်း ရှိသေးတယ်။
ဒေါက်တာတင့်ဆွေ
Comments
Post a Comment