တက္ကသိုလ်ကျောင်းသူတဦး (၂)

ဆရာတင့် ဒီသီချင်းကို တက္ကသိုလ်အေးမောင်လည်း ဆိုထားတယ်ထင်တယ်

ကျွန်တော်က တေးဂီတမှာ အလွန်ညံ့တယ်။ ကွန်မင့်ရေးသူက လူရင်းဖြစ်တော့ ပြောဦးမယ်။ ကျွန်တော်ထင်တာတော့ တက္ကသိုလ်ကျောင်းသူတဦးဦးကို ရည်းစားထားသူ၊ တက္ကသိုလ်ကျောင်းသူတယောက်ယောက်ကို လိုက်ပိုးပမ်းသူတွေအကုန်က ဒီသီချင်းကို ဆိုကြလိမ့်မယ်ထင်တယ်။ ဆိုတဲ့သူတွေ အများကြီးပေါ့။

သီချင်းတင်တဲ့သူတွေက မူရင်းအဆိုတော်အမည်ကို မတင်ကြတော့ နောက်ဆိုသူတွေကိုသာ သီချင်းပိုင်ရှင် ထင်နေကြတယ်။

သီချင်းက ဆိုလို့လည်းကောင်းတော့ အမျိုးသမီးတွေကပါ ဆိုသေးတယ်။ မူရင်းအဆိုတော် ကိုမင်းနောင်သမီးပုံနဲ့ တွေ့တယ်။

လွန်ခဲ့တဲ့ ၂-၃ နှစ်လောက်က တက္ကသိုလ်ကျောင်းသူတဦး သတ်ပုံမှန်တာလိုက်ရှာတော့ မုံရွာတက္ကသိုလ် ၂၀၁၉ ဘွဲ့ယူများခေါင်းစဉ်နဲ့ပို့စ်မှာ မှန်တယ်။ 

ရန်ကုန်တစ်ကသိုလ်နဲ့ မန္တလေးတစ်ကသိုလ်တွေကတော့ မြန်မာစာ မှန်အောင်မရေးတတ်ကြတော့ဘူး။ တစ်ကသိုလ်ကျောင်းသူတဦးဆိုရင်တော့ အတော်ရုပ်ဆိုးမယ်ထင်တယ်။

တက္ကသိုလ်ကျောင်းသူတဦး (ရေး ဗိုလ်ကလေး တင့်အောင်၊ ဆို ကိုမင်းနောင်) https://www.youtube.com/watch?v=gQWRSagfR3g

ခုခေတ်မှာ မူရင်းတွေပျောက်ကုန်ပြီ။ အရင်ရေးတဲ့သူစာအုပ်တွေကို ပြင်ပြီး သူတို့ရေးတာလိုလို လုပ်နေကြတယ်။ သီချင်းတွေ ကဗျာတွေသာ ဘယ်ကမလည်း တရားတွေကိုလည်း ပြင်လိုက်ကြတာ အခုဆို တစ်ရားလို့ရေးမှ ခေတ်မီသတဲ့။

ဒေါက်တာတင့်ဆွေ