နဂါးနီ သီချင်း

နဂါးနီစာအုပ်အသင်းကို ကိုလိုနီခေတ်ဦးကာလက သခင်နုနှင့် ဦးထွန်းအေးတို့က ဦးဆောင်ပြီး ၁၉၃၇ နိုဝင်ဘာ ၄ ရက်နေ့မှာ တည်ထောင်ခဲ့တယ်။ သခင်လူငယ်တွေက ပြည်သူလူထုသိကြစေရေးအတွက် သီချင်းတပုဒ်နဲ့ ဝါဒဖြန့်ဘို့ စိတ်ကူးမိခဲ့ကြသည်။

ဦးနုက နဂါးနီတိုတ်ထုတ် "လူမွဲတို့၏ထွက်ရပ်လမ်း" စာအုပ်မှ အချက်အလက်တွေကို ထုတ်နုတ်ပြီး၊ စကားလုံးတွေကိုပါ စီကုံးရွေးချယ်ခဲ့တယ်။ 

ပြီးတော့ သခင်အုန်းခင် (ဗမာ့ခေတ်ဦးအုန်းခင်) နဲ့အတူ ဒီဒုတ်ဦးဘချိုဆီကို သွားရောက် ပြသကြတယ်။ ဒီးဒုတ်ဦးဘချိုက သခင်အုန်းဆိုင် (ဂီတစာဆို ရွှေတိုင်ညွန့်) ဆီကိုလွှတ်ပြီး နဂါးနီသီချင်း ဖြစ်လာတယ်လို့ လေ့လာသိရှိရပါတယ်။

နဂါးနီ သီချင်း

၁။ ဆင်းရဲခြင်းလွတ်ကင်းအောင်

လမ်းပြဆောင်ပါမည်

ရတနာခုနှစ်သွယ်

တကယ်ပင်စုံညီ

တို့အမျိုးသားတိုင်းပြည်

မွဲတဲ့သူ လှူဒါန်းနိုင်မည်

ကျောင်းဆောက်ခါ

ဘုရားပါတည်

ဘိုးဘိုးအောင်နဲ့

ရှင်အဇ္စျ ဂေါဏတို့

(မ) တဲ့ကိန်းဆိုက်ပြီ

၂။ ကျန်းကျန်းမာမာ

ချမ်းချမ်းသာသာ

ဘေးရန်ကာဆီးမည်

လူမွဲတွေက

မနှေးခေတ်မီ

သူဌေးဖြစ်တော့မည်

တို့နဂါးနီ

သိဒ္ဓိတန်ခိုးနဲ့

ဆင်းရဲသားတို့

မညှိုးပြီ

အကျိုးထူးပေးတော့မည်

ခေတ်သစ်ထူထောင်မည်

ဧချမ်းသာယာမည်

ဟေ့ နဂါးနီတန်ခိုးနဲ့

အမျိုးဂုဏ်တက်စေမည်

၃။ နေရေးနဲ့စားသောက်ရေးပါ

မနှေးအောင်ပင်

ချောင်လည်ရမည်

လူမွဲများ စိတ်ချမ်းသာအောင်

ကြံဆောင်မည် တို့နဂါးနီ

သာသနာရောင်

ဘာသာရောင်

ထွန်းလင်းပြောင်မည်

ကောင်းစားမယ့် တို့မြန်ပြည်

ရွှေမိုးရွာမည်

၄။ သိဒ္ဓိအဖုံဖုံ

လုံခြုံစေမည်

နေ့စဉ်ညစဉ်ဖိုမထိုးဘဲ

အကျိုးပေးနိုင်သည်

မြန်မာပြည်

နဂါးနီတံခိုးနဲ့

မြေရှိုးပါလို့

မိုးပြန်နိုင်မည်

မွဲတဲ့လူတွေ

ငွေမရှားရအောင်

တိုးပွါးဘို့

ဆောင်ရွက်ကာမှန်း

ထွက်ရပ်လမ်းပြမည်။ ။

ဆရာရွှေတိုင်ညွန့်က နဂါးနီသီချင်းကို ရေးဖွဲ့ပေးခဲ့ပြီးနောက် နိုဝင်ဘာလ ၂၃ ရက်နေ့၊ ရန်ကုန်မြို့ မြူနီစီပါယ် တောင်းဟော၊ ခမ်းမကြီး၌ ကျင်းပသော နဂါးနီဟောပြောပွဲ၌ အထက်ပါသီချင်းကို ဗြိသိသျှဘားမား ရုပ်ရှင်ကုမ္ပဏီ၊ ရုပ်ရှင်မင်းသား ခင်မောင်ရင်နှင့် အဆိုတော် မခင်ထွေးတို့ တွဲဖက်ဖျော်ဖြေခဲ့သည်။

မှတ်ချက် - သီချင်စာသားကို မူရင်အတိုင်း စာသားရော သတ်ပုံပါ မပြင်ပါ။

(ပုံအတွက် Mya Myinzuu Phoo ကျေးဇူး)

နဂါးနီသီချင်း ကွန်မင့်များ

၁။ 'တွဲဖက်'လို့ တော့ ရေးပါဆရာ။ 'တွဲဖတ်'လို့ ဖတ်ရတာ ခုခေတ်လူငယ်တွေ 'ဂျပန်စာတက်ချင်လို့ ဘယ်ကျောင်းတတ်ရမလဲ' လို့ 'က်' 'တ်'နဲ့ ရောနေသလို ခံစားရပါတယ်။

ကျေးဇူး။ အဲလို ကူးချတာကနေ အမှားပါတာမျိုးမကြာခဏ ကြုံရတယ်။ မမှားသင့်ဘဲ မှားတယ်။ ကျွန်တော်က စာရေးဖြစ်တာကများ၊ စိတ်ကလည်းစောတော့ အမှားများတယ်။ ကံကောင်းချင်တော့ အမှားပြင်ပေးသူ အနည်းဆုံး ၂ ဦးရှိတယ်။ သူတို့က အဲဒါကို မတွေ့ကြသေး။

၂။ နဂါးနီသီချင်းရေးသူနှင့်ပတ်သက်ပြီး ဖတ်ဖူးတာလေးပြောပါရစေခင်ဗျာ။ အများသိတာကတော့ နဂါးနီသီချင်းရေးသူက ရွှေတိုင်ညွန့်ပါ အမှန်တော့ ရွှေတိုင်ညွန့်မဟုတ်ပါဘူး ဦးနု(ဝန်ကြီးချုပ်)ရေးခဲ့တာပါ သီချင်းစာသားတွေကလူပေါ်လူဇော်လုပ်နည်း (မိတ္တဗလဋီကာ-ဦးနု/ရေး) စာအုပ်ထဲက စာသားတွေကိုကောက်နှုတ် ရေးသားထားတာဖြစ်ပါတယ်။ ရွှေတိုင်ညွန့်က သံစဥ်ထည့်ပေးတာပါ တေးဆိုက ရုပ်ရှင်မင်းသားကြီး ခင်မောင်ရင် ဖြစ်ပါတယ်၊ ကျွန်တော်အမှတ်မမှားခဲ့ဘူးဆိုရင် (၁၉၃၂)လောက်ကဖြစ်လောက်ပါတယ်။ အမှတ်မှားချင်လည်းမှားနိုင်ပါတယ် လူပေါ်လူဇော်ကို ပထမအကြိမ်ထုတ်တာက(၁၉၃၈)စက်တင်ဘာလဖြစ်လို့ပါ။

တေးရေးရွှေတိုင်ညွန့်ဖြစ်ရခြင်းက ထိုအချိန်က ရွှေတိုင်ညွန့်ဟာ ကိုလံဗီယာဓာတ်ပြားကုမ္ပဏီမှာ လခစားမို့ ပြင်ပသီချင်းတွေကို လက်ခံအသံသွင်းခွင့် မရှိပါဘူး။ (၁၉၉၅)ခုနှစ် စက်တင်ဘာလထုတ် မိုးဂျာနယ်မှ။

၃။ "ကျောင်းဆောက်ခါ" "ဆောင်ရွက်ကာမှန်း" ကာ/ခါ စာစီဆရာပဲလွဲလေသလားမသိပါ ဆရာ

နဂါးနီသီချင်းစာသားမှာ စာလုံးပေါင်းသတ်ပုံတချို့ ပြင်စရာပါတယ်။ တင်တဲ့စာမှာ ပြင်မထားပါ။ ခုနစ်သွယ်၊ ကျောင်းဆောက်ကာ၊ ခေတ်မီ၊ တန်ခိုး၊ အေးချမ်း၊ မိုးပျံ။ မူရင်းကိုလည်း သိသင့်လို့ ကူးချတာမှာ မပြင်ပါ။ သီချင်းကို ကွန်တော်ရေးတာ မဟုတ် ရွှေတိုင်ညွန့် ရေးတာ။ ခုခေတ်မှာ မြို့မငြိမ်းသီးချင်းတွေကိုလည်း ထင်သလိုပြင်၊ ရွှေပြည်အေးသီချင်းတွေကိုလည်း လိုသလိုပြင်၊ စိုင်းခမ်းလိတ်သီချင်းတွေကိုလည်း မှားအောင်ပြင်နေကြတယ်။ မလုပ်ကောင်းပါ။ မြစေတီကျောက်စာကို ပြင်ရေးသလို ဖြစ်နေတယ်။ ကျွန်တော်က ကျောက်စာထဲမှာ တစ် ရေးထားတာကို တ လို့ မပြင်ပါ။

၄။ နဂါးနီ သီချင်းဖြစ်ပေါ်လာပုံ သမိုင်း https://www.youtube.com/watch?v=-3Wo-6pahpY

ကျွန်တော်တို့ဘဝကတော့ ပုံထဲက အမျိုးသားကြီးလို ရောင်ထုံးမပါတော့ပေမဲ့ ပုဆိုးခါးတောင်းကြိုက် မဖြုတ်ကြရသေးပါ။

မှတ်ချက်

နဂါးနီသီချင်းက အခုထိလည်း နှစ်ခြိုက် ခေတ်စားနေဆဲဖြစ်ပါတယ်။ သီချင်းပေါ်ထွက်ခဲ့တာ နှစ်ပေါင်း ၈၀ ရှိပြီ။ လူမွဲတွေ သူဋ္ဌေးဖြစ်လာကြပါစေသတည်း။

ဒေါက်တာတင့်ဆွေ