ပင်ပန်း ပန်းပင်
၁။ စိတ်ပမ်းတယ်ဆိုတာမှန်သလားဗျ စိတ်ပန်းလား အဖြေမရှင်းလို့ပါ မြန်မာစာမြတ်နိုးသူတစ်ယောက်မို့မေးတာပါ သတ်ပုံတော်တော်လေး လေ့လာသင်ယူနေပါတယ် စိတ်ပန်းတယ်ကို အမှန်ထင်နေလို့ပါ စာအရေးအသားမှာရော ရှိလို့လားဗျ စိတ်ပူတယ်လို့ဘဲ့ တွေ့ဖူးတာဆိုတော့ ပင်ပမ်းတယ်လို့တော့ တွေ့ဖူးပါတယ်ဗျ
၂။ တင်ထားတာတခုက ပင်ပမ်းနေပါစေ လိုရာရောက်ဖို့ ကျွန်တော် ရှေ့ဆက်နေရမယ်တဲ့။ ပင်ပမ်းလို့ရေးတာ မှားနေတယ်။
၃။ ပင်ပမ်းနေချိန် ကဗျာတစ်ပုဒ်ဖတ်ရတာလောက်အရသာ ရှိတာမရှိပီ
တစ်ပုဒ် မမှန်ပါ။ ပီ မှားတယ်။ ပင်ပန်းနေချိန် ကဗျာတပုဒ်ဖတ်ရတာလောက် အရသာရှိတာ မရှိပြီလို့ ရေးရတယ်။
၄။ ပင်ပမ်းသမျှလို့ ရေးတာတခု တွေ့လိုက်တယ်။ ပင်ပန်းလို့ ရေးရတယ်။
အခုခေတ်မှာ မြန်မာစာကို ဓါတုဗေဒလို ဖေါ်မြူလာတွေနဲ့ သင်နေတယ်။ သိသလောက် ပုံသေနည်း ၄-၅ ခု ရှိတယ်။ ခြွင်းချက်တွေပါနေတယ်။ ဖေါ်မြူလာဆိုတာ အမြဲ မှန်ရတယ်။ အောက်စီဂျင် ၂ လုံးနဲ့ ဟိုက်ဒဂိုဂျင် ၁ လုံး ပေါင်းမှသာ ရေ ဖြစ်တယ်။
ကျွန်တော်တို့ဆရာ ဘုတလင်ချစ်လေးက သတ်ပုံအတွက် အသေမှတ်စရာ တခုသာ သင်ပါတယ်။ ပင်ပန်း ပန်းပင် တဲ့။
အခုထိ မမေ့တော့၊ မမှားတော့ပါ။ အဲလိုအမြဲမှန်တာကိုသာ ဖေါ်မြူလာ ပုံသေနည်းလို့ခေါ်တယ်။ အခုခေတ်သင်နေတဲ့ မြန်မာစာပုံသေနည်း ၄-၅ ခု မမှန်ပါ။
- ရေတွက်လို့ရရင် တစ် - မှားတယ်။ တပြား၊ တပဲ၊ တမတ်၊ တကျပ်၊ တဆယ်၊ တရာတန်တွေ တရားဝင်ထုတ်ခဲ့တယ်။
- မ နောက် ဘဲလိုက် - မမှန်ပါ။ ပန်းပန်လျက်ဘဲ။ သူငယ်ချင်းလို့ဘဲ ဆက်၍ခေါ်မည်ခိုင်။
- ကလေးဗူးမှုတ်တာကလွဲရင် ဘူး - မဟုတ်ပါ။ ဗူးဘုရား ပုဂံမှာရှိတယ်။
- ခဂငဒပဝ မောက်ချနဲ့ရေးရအထိတော့ မှန်သေးတယ်။ ကျန် ၂၇ လုံးကို မောက်ချမသုံးရဆိုရင် မှားပြီ။ ဓါတုကလျာ၊ ဓါတုဗေဒ။
ဖေါ်မြူလာဆိုတာ အမြဲ မှန်နေရတာမျိုး။ H2O ရေ။ H2O မဟုတ်ရင် ရေမဖြစ်ပါ။
ဒေါက်တာတင့်ဆွေ
Comments
Post a Comment