ဦးမှား နှင့် ဒေါ်လွဲ

(အတုနှင့် အစစ် သို့မဟုတ် မလုပ်သင့်မလုပ်ထိုက်တဲ့ ဒေါင်းလုဒ်စာအုပ်များ)

အွန်လိုင်းမှာ ဒေါင်းလုဒ်လုပ်နိုင်တဲ့စာအုပ်တွေ အများကြီးတင်ထားကြတယ်။ တချို့စာအုပ်တွေက အတော်ကို တန်ဖိုးရှိတယ်။ တချို့စာအုပ်တွေကတော့ မလုပ်သင့်မလုပ်ထိုက်တာတွေ။ ချက်ချင်းဖျက်ပစ်သင့်တယ်။

မြန်မာ့စွယ်စုံကျမ်း (ဦးနု) လိုတင်ထားတယ်။ မြန်မာ့စွယ်စုံကျမ်းကို ဝန်ကြီးချုပ်ဦးနုက ပြုစာထားခဲ့တာ မဟုတ်ပါ။ ကျွန်တော်က မူရင်းစာအုပ်တစုံလုံးကို အခုတိုင်းပြည်အထိ ရအောင်သယ်ယူလာခဲ့ပါတယ်။

အွန်လိုင်းတင်ထားတာမှာ သတ်ပုံတွေကို ပြင်ထားတယ်။ နမူနာနည်းနည်းလေးသာ ထောက်ပြပါမယ်။ အတွဲ (၁) စာမျက်နှာ (၁)။

ကကတစ်။

မူရင်းစာအုပ် = ကကတစ်သည် မြန်မာနိုင်ငံ ကမ်းရိုးတလျှောက်၌တွေ့ရသော အရေးကြီးသည့် စားငါးတမျိုးဖြစ်သည်။

အွန်လိုင်းစာအုပ် = ကကတစ်သည် မြန်မာနိုင်ငံ ကမ်းရိုးတစ်လျှောက်၌တွေ့ရသော အရေးကြီးသည့် စားငါးတစ်မျိုး ဖြစ်သည်။

တ နှစ်လုံးကို တစ် လို့ပြင်ထားတယ်။ မပြင်ရပါ။

ကကုသန်မြတ်စွာဘုရား။

မူရင်းစာအုပ် = ဘုရားငါးဆူပွင့်ရာ ဤဘဒ္ဒကမာ္ဘအတွင်း ပွင့်တော်မူခဲ့ပြီး ဘုရားလေးဆူအနက် ပဌမဆုံးပွင့်တော်မူသော ဘုရားရှင်ဖြစ်သည်။

အွန်လိုင်းစာအုပ် = ဘုရားငါးဆူပွင့်ရာ ဤဘဒ္ဒကမာ္ဘအတွင်း ပွင့်တော်မူခဲ့ပြီး ဘုရားလေးဆူအနက် ပထမဆုံး ပွင့်တော်မူသော ဘုရားရှင်ဖြစ်သည်။

ပဌမ ကို ပထမ လို့ပြင်ထားတယ်။ မပြင်ရပါ။

အချက်အလက်လည်းမမှန်၊ သတ်ပုံတွေလည်းလွဲအောင်ပြင်ထားခြင်းဟာ မလုပ်သင့်မလုပ်ထိုက်တာလို့ ယူဆပါတယ်။ အဲလိုစာအုပ်တွေကို ချက်ချင်းဖျက်ပစ်သင့်တယ်။

အဲလို မှားအောင်ပြင်ထားတဲ့ ဒေါင်းလုဒ်စာအုပ်တွေအဖုံးမှာ အယ်ဒီတာ ဦးမှားနှင့် ဒေါ်လွဲတို့က ပြင်ထားပါသည်လို့ ရေးရပါမယ်။

ဒေါက်တာတင့်ဆွေ

၃၀-၁၀-၂၀၁၈