အရပ်မျက်နှာအလိုက် ပို့တာ၊ ၄၊ ၈၊ ၁၀ မျက်နှာ။ တခါတခါ ကမ္ဘာမြေပုံကြီးကို စိတ်ကူးပြီးပို့တယ်။ ကျွန်တော်က ပထဝီလည်းဝါသနာပါတယ်။ အီကွေတာမျဉ်းနဲ့ ဂရင်းနစ်မျဉ်းတို့ ဆုံတဲ့နေရာမှာ ရပ်နေပြီး ပို့နည်းလည်း စမ်းကြည့်လေ့ရှိတယ်။
ပြည်ပနိုင်ငံရေးလုပ်ခဲ့စဉ်က နယူးဒေလီမှာနေခဲ့ပြီး တခြားတိုင်းပြည်တွေအများကြီးကို ခရီးတွေထွက်ခဲ့ရတယ်။ အဖွဲ့ရုံးရှိတဲ့ အမေရိကကိုသွားတဲ့အခါ ဒေလီကနေ အနောက်အရပ်ထွက်ပြီး ဥရောပကတဆင့်ဖြစ်ဖြစ် အရှေ့အလယ်ပိုင်း နိုင်ငံတခုက ဖြစ်ဖြစ်သွားရတယ်။ တခါတခါ မြောက်အရပ်ထွက်ပြီး မော်စကိုကတဆင့်။ ခရီးစဉ်တခုမှာ အရှေ့ဖက်မှာရှိတဲ့ ဂျပန်ကနေ၊ မြောက်အမေရိကတိုက်ရဲ့ အနောက်ဖက်စွန်းက လော့စ်အင်းဂျဲလိစ်၊ နောက်ဆက်ပြီး ရှေ့စွန်းနားက ဝါရှင်တန်ဒီစီကို သွားရတယ်။ ကမ္ဘာ့တောင်ဘက်ခြမ်းက သြစတေးလျကိုလည်းရောက်တယ်။ တောင်နားက သီရိလင်္ကာနဲ့ မြောက်ဘက် ကပ်နေတဲ့ နီပေါလ်နဲ့ တရုပ်ပြည်လည်းရောက်တယ်။
နေတဲ့မြို့ကနေ အရှေ့ အနောက် တောက် မြောက် သွားရတာပါ။ အလုပ်တွေပြီးတာနဲ့ နယူးဒေလီပြန်လာတယ်။ အပြန်ခရီးအားလုံးက ပြောင်းပြန်။
စပိန်နိုင်ငံသား ဖာဒီနန်မာဂျယ်လန်ဟာ တောင်အမေရိကတိုက် တောင်ဘက်စွန်းအထိ ရောက်တယ်။ မာဂျယ်လန် ရေလက်ကြားလို့ ခေါ်တယ်။
မာကိုပိုလိုဟာ အီတလီကနေ ခရီးတွေထွက်တာ ဟိုအရှေ့ဖျားက တရုပ်ပြည်ကိုရောက်တယ်။
နယူးဇီလန်န်ိုငံသား အဒ်မွန်ဟယ်လာရီနဲ့ နီပေါလူမျိုး တန်ဇင်းတို့ဟာ ၁၀၅၃ ခုနှစ်မှာ ဧဝရက်တောင်ထိပ်ကို ပဌမဦးဆုံး ရောက်ခဲ့ကြတယ်။ သူတို့က အောက်အနေ အထက်ကို တက်ကြတာ။
ကမ္ဘာကြီးက လုံးဝန်းနေတာမို့ အရပ်တခုကို တည့်တည့်သွားရင် စထွက်တဲ့နေရာကို ပြန်ရောက်တယ်။ ကမ္ဘာပတ်လည် ရက်ရှစ်ဆယ် စိတ်ကူးယဉ်ဝတ္ထုကို ၁၈၇၃ ခုနှစ်ကတည်း ပြင်သစ်စာရေးဆရာ ဂျူလီဗန်းကရေးထားတာ။
မေတ္တာပို့ကြသူတွေ ဘယ်အရပ်မျက်နှာတွေကိုပို့ပို့ ကမ္ဘာကြီးလုံးဝန်းနေသလို ပို့တဲ့သူဆီကို ပြန်လာပါတယ်။ မေတ္တာရ၍ ကျန်းမာကြပါစေ။
ဒေါက်တာတင့်ဆွေ
၂၇-၃-၂၀၁၉
Comments
Post a Comment