ကိုး တဆယ် ကြက်မကြီးကိုဝယ်

(ကလေးကဗျာတချို့)

ခုန်ဆွ ခုန်ဆွ အစာရှာ

ကျီးလေး တကောင်ပါ

    တစာစာ ပျံလို့သွား

    အ အာ အား၊ အ အာ အား။   ။

ထမီစလေး ဆွဲလို့ပါ

မင်းသမီးလေး ကနေတာ

     လက်ဆန့်ကာ ခြေကိုကား

     က ကာ ကား၊ က ကာ ကား။   ။

ကျွဲကျောင်းသားလေး မောင်ဖိုးနီ

သွားလေးစိလို့ စီ

      ကျွဲကြီးလာပြီ တက်ကာစီး

      စိ စီ စီး၊ စိ စီ စီး။   ။ (အမည်မသိဆရာ)

ရွှေနဂါး ခြုံစရာ

ဖဲကတ္တီပါ

ဖဲကတ္တီပါ ရှာပါတုန်း

မိုးတောင်ကချုန်း 

မုန့်လုံး။   ။

မုံ့လုံး စက္ကူကပ်လို့

ကြာကလပ်မှာ ဆွမ်းတော်တင်

ပလ္လင်ပေါ်က မျောက်ကလေး

ဆင်းတယ်လို့လွေး

ဂျာအေး။   ။

ဂျာအေးကို သူ့အမေရိုက်ပါလို့

မှောင်မိုက်မှာငို

ကိုလူပျို ထရံပေါက်က

ခြေထောက်ကိုဆွဲ တွဲလွဲ

တွဲလွဲနေပါအုံး

မိုးတောင်ကချုန်း

မုန့်လုံး။   ။ (ဂျာအေးကဗျာ မူကွဲ- အမည်မသိ ရှေးစာဆို)

တစ် နှစ် အင်္ကျီဝတ်

သုံး လေး တံခါးပိတ်ပေး

ငါး ခြောက် တုတ်တွေကောက်

ခုနစ် ရှစ် တည့်တည့်ပစ်

ကိုး တဆယ် ကြက်မကြီးကိုဝယ်။   ။ (ဒေါက်တာမောင်ဖြူး-ဘာသာပြန်)

One, two, buckle my shoe.

Three. four, knock the door.

Five, six, pick up sticks.

Seven, eight, lay them straight.

Nine, ten, a big.. fat hen.

၁ - ၂ - ၃၊ သစ်ဝါးစုလို့ရုံး၊

၄ - ၅ - ၆၊ တဲအိမ်ကလေးဆောက်၊

၇ - ၈ - ၉၊ ခေါင်ကို သက်ငယ်မိုး၊

၁၀ - ၁၁- ၁၂၊ နေဖို့ အိမ်အသစ်။   ။ (ဦးဖေမောင်တင် + မင်းသုဝဏ်)

ရေပုံး ၁-လုံး၊ တုံး ၂-တုံး၊

     သင်ပုန်း ၃-ချပ်ပါ။

အရုပ် ၄-ကောင်၊ စာ ၅-စောင်၊

     ကလောင် ၆-ချောင်းပါ။

စာအုပ် ၇-အုပ်၊ မုံ့ ၈-ဆုပ်၊

     ဦးထုပ် ၉-လုံးပါ။

နောက်ဆုံးထပ်ဆင့်၊ ပန်းဆယ်ပွင့်၊

     အသင့် တွက်ပြီးပါ။   ။ (ဆရာကြီးဦးကွန်း)

(ရှေးစာကဗျာများ)

ဒေါက်တာတင့်ဆွေ