တပါတီစနစ်

တင်ထားတဲ့စာ = ရှစ်လေးလုံး နဲ့ ကျွန်တော်

ကွန်မင့်တခု = ဖြစ်နိုင်မယ်ဆိုရင် ၈၈၈၈ သမိုင်းအကြောင်းကို ဆရာကြုံခဲ့ရသမျှ နောက်လူတွေ သိခွင့် လေ့လာခွင့်ရစေဖို့ ရေးပေးစေလိုပါတယ်ဆရာ။ အခုလို အနည်းအငယ်သိခွင့်ရတာကိုလဲ ကျေးဇူးတင်းပါတယ်။

ဟုတ်။

ရှစ်လေးလုံး ပြည်လုံးကျွတ်အရေးတော်ပုံကြီးမှာ "လှည်းနေလှေအောင်း မြင်းဇောင်းမကျန်" ဆိုသလို ပါဝင်ခဲ့ကြတယ်။

နည်းနည်းလေးသာရှိတဲ့ ကျွန်တော်ပါဝင်ပတ်သက်မှုကို နှစ်ပတ်လည်စာအဖြစ် တင်ပြထားပါတယ်။

သိမီသူတွေ အများကြီးလည်း သက်ရှိထင်ရှား ကျန်ပါသေးတယ်။

ရေးသားကြတယ်။ စာအုပ်ထုတ်ကြတယ်။ အင်တာဗျူးတွေ ဖြေကြတယ်။ အများကြီး။

ပြောကြ ဟောကြ ရေးသားခဲ့ကြတယ်။ အများကြီး။

ရှစ်လေးလုံးဆိုတာ ကျောင်းသားတွေက ဦးဆောင်ပါတယ်။

သင်ခန်းစာ (၁)

တဝက်တပျက် ဒီမိုကရေစီအစိုးရလက်ထက်မှာ ပဌမဆုံးအကြိမ် ၈၈၈၈ အမှတ်တရနေ့ လုပ်ခွင့်ရခဲ့တယ်။

ဆော်သြချက်တခုက "တို့တစ်တွေ" ဆိုဘဲ။

ကျောင်းတော်သားခေါင်းဆောင်တွေ သတ်ပုံမမှန်ကြတော့ပါ။

၈-၈-၁၉၈၈ နေ့က ဆောင်ပုဒ်တခုက "တပါတီအာဏာရှင် မလိုမရှိ"။

အခုတော့ "တပါတီ" ကို မှန်အောင်ရေးတတ်သူ နည်းသွားပြီ။ "တို့တတွေ" ကို မှန်အောင်ရေးတတ်သူ နည်းသွားပြီ။

ခေတ်စနစ်ကနေ လူတွေကိုသာမက မိခင်ဘာသာစာကိုပါ ဖျက်ဆီးလိုက်ပါတယ်။

အခုနေမှာ မူရင်းအမှန် အကြောင်းအချက်နဲ့ အရေးအသားတွေကို သက်သေခံနဲ့တကွ တင်ပြသူတွေကို ဆဲဆိုကြပါတော့တယ်။

အသက်ပေး စတေးသွားကြသူတွေကို အားနာစရာကောင်းလွန်းလှတယ်။ ဘာသာစာပျက်တာကို သိမသွားကြပါ။

သင်ခန်းစာ (၂)

အခုဆိုရင် ၃၇ နှစ်တင်းတင်းရှိပြီ။ ၁၉၈၈ တုန်းက ပါဝင်ခဲ့သူတွေ အခု ဘယ်မှာလဲ၊ ဘာတာဝန်တွေယူနေကြသလဲ။ နိုင်ငံရေးအရောင် ဘယ်အရောင်ဖြစ်နေကြသလဲ။ ဘယ်သူတွေက ဇောက်ထိုးပြောင်းပြန် ဖြစ်ကုန်ပြီလဲ။

အခု ၂၀၂၁ ကစပြီး တော်လှန်နေကြသူတွေ နောင် ၁၇၊ ၂၇၊ ၃၇ နှစ်မှာ ဘယ်လိုတွေ ဖြစ်လာကြလေမလဲ။

၈-၈-၁၉၈၈ မှာ အသက်ပေးသွားကြသူတွေ ကောင်းရာမွန်ရာ လာပါစေသတည်း။

ဒေါက်တာတင့်ဆွေ