သတ်ပုံအများတွေကို ထောက်ပြနေတာ ၁၅ နှစ်လောက်ရှိပြီ။
- တချို့က ရိုင်းကြတယ်။
- တချို့က ဆဲဆိုကြတယ်။
- တချို့က အမှားဘက်ကနေ ကာကွယ်ပြောဆိုကြတယ်။
- တချို့က မှန်မှန်မှားမှား ပညတ်ဆိုပြီး တရားအတုပြကြတယ်။
၁၉၈၆ ခုနှစ်ကစပြီး အရင်ကမှန်နေတဲ့တဲ့ တဝမ်းပူစာလုံး ၇၀% လောက်ကို စသတ်စေသတည်း အမိန့်ထုတ်ပါတယ်။
ဆယ်စုနှစ် ၂ ခုလောက်အကြာမှာ တဝမ်းပူ ၉၀% လောက်အထိကို စသတ်လာကြတယ်။
မြန်မာစာ ကံဆိုးချင်တော့ ဘယ်လိုမှ၊ ဘယ်နည်းနဲ့မှ မရေးလောက်ဘူးလို့ ထင်ရတဲ့စာလုံးတွေကိုပါ တစ်လာကြတယ်။ ဥပမာ
‘အရေးတစ်ကြီး’
‘သစ္စာတစ်ရား’
‘မေတ္တာတစ်ရား’
‘တစ်မလွန်ချစ်သူ’
‘တစ်မာရွက်ဆား’
'ရတစ်နာ'
'တစ်ကောင်း'
'တစ်ဒင်္ဂ' ၂၆ လုံးတွေ့ထားတယ်။ အခုလောက်ဆို ပိုများနေလောက်ပြီ။
‘မြတ်ဗုဒ္ဓ၏တစ်ရားတော်များ’ ၃၇ လုံးတွေ့ထားတယ်။ အခုလောက်ဆို ပိုများနေလောက်ပြီ။
ဟောလိဝုဒ်ကရိုက်တဲ့ Collateral Damage ရုပ်ရှင်ရှိတယ်။
တောင်အမေရိကမှာ မူးယစ်ဆေးဂိုဏ်းကြီးတွေ ရှိတယ်။ အမေရိကန် စီအိုင်အေနဲ့ ဒီအီးအေက နှိမ်နင်းရေးလုပ်တယ်။ စီအိုင်အေအေးဂျင်တယောက်က လူဆိုးဗိုလ်ကြီးအိမ်နားထိ ရောက်အောင်သွားပြီး လေဆာနဲ့ ထိုးပြတာကို ဂြိုဟ်တုကနေ ဒုံးပျံလက်နက်နဲ့ ပစ်တယ်။
ကံဆိုးချင်တော့ လူဆိုးကြီးရဲ့ သားသမီးတွေ သူတို့အဖေနား အချိန်ကိုက် ရောက်လာကြတော့ မိသားတစုလုံး သေကြပါရောလား။ အဲလိုဖြစ်တာကို 'ကိုလက်ထရယ် ဒင်းမေ့ချ်' လို့ ခေါ်တယ်။ ဘေးနားကဟာတွေပါ ထိခိုက် ပျက်စီးတာမျိုး။
ဘာသာစကားနဲ့ စာဆိုတာ ဟိုရှေးကတည်းကပေါ်ပါတယ်။
အပြောင်းအလဲတွေလည်းရှိတယ်။
ပိုကောင်း ပိုမှန် ပိုလွယ်အောင် ပြောင်းရတယ်။
စကားလုံးသစ်တွေလည်း တိုးတယ်။
သတ်ပုံကျမ်းတွေရေးကြတယ်။ အဘိဓာန်တွေထုတ်ကြတယ်။ ဘာသာတိုင်းမှာ အဲလိုရှိကြပါတယ်။
ခေတ်သဘောအရ မူဟောင်းတွေကို ပညာရှင်တွေက စိစစ်ပြီး အဘိဓာန် အသစ်ထုတ်ကြရတယ်။
မြန်မာစာ၏ထူးခြားမှု
၁။ ပညာရှင်တွေက စုပေါင်းပြီး စိစစ်ထုတ်ဝေထားခဲ့တာ နောက်ဆုံးထုတ်က ၁၉၇၈-၇၉-၈၀ အဘိဓာန်။
၂။ မြန်မာစာအာဏာပိုင်အသစ်တွေက တဖန် ၁၉၉၁ ခုနှစ်မှာ အဘိဓာန်အသစ် ထုတ်ပြန်တယ်။
၃။ မြန်မာစာအာဏာပိုင်အသစ်တွေရဲ့ အဘိဓာန်အသစ်မထုတ်မီမှာ ရုံးအမိန့်စာနဲ့ သတ်ပုံတွေကို ပြင်ခိုင်းတယ်။ ဥပမာ သိသူတဦးကနေ ပြောပါတယ်။ ကျောင်းပထမအစမ်းတုန်းက တ စာလုံးတွေကို အတန်တင်စာမေးပွဲမတိုင်ခင် တစ် လို့ရေးရမယ်ဆိုတဲ့အမိန့်လာကြောင်း။
၄။ ဝိဝါဒကွဲနေတဲ့စာလုံးတွေကို မူကွဲလို့ခေါ်တယ်။ မူကွဲရဲ့သဘောက ကိုယ်သဘောကျရာကို ယူနိုင်တယ်။ ဥပမာ ပထမနဲ့ ပဌမ။ သမတ နဲ့ သမ္မတ။
၅။ ခေတ်သဘောအရ ပြင်ခြင်းဆိုတာ မူဟောင်းထက် ပိုမှန်၊ ပိုမြန် ပိုရှင်းစေအောင် ပြောင်းရတာဖြစ်တယ်။ ဥပမာ မိုဃ်း နဲ့ မိုး။ ၏့ နဲ့ ၏။
တချို့အပြောင်း ကောင်း။ တချို့အပြောင်း မကောင်း။
၆။ ဘေးထွက်ဆိုးကျိုးနှင့် မလိုလားအပ်တဲ့ ဆိုးကျိုးများ
- မြန်မာစာ စာလုံးပေါင်းသတ်ပုံအမှန်အဖြစ် ဘယ်မူကိုယူရမလဲ တွေဝေစေတယ်။
- အမိန့်ကိုမလွန်ဆန်ရဲသူဦးရေက အဆမတန်များတယ်။ အရေးအသားမူအုပ်စုနှစ်ခု ရန်စောင်လာကြတယ်။ အားပြိုင်လာကြတယ်။
သုံးသပ်ချက်
၁။ မြန်မာစာအရည်အသွေး ကျဆင်းလာပါသည်။
၂။ တိုင်းပြည်အခြေအနေမကောင်းသဖြင့် မြန်မာစာကိုဂရုစိုက်ခြင်း မရှိသလောက်နည်းပါးလာပါသည်။
၃။ မှားရေးသူတွေ ပို၍ပို၍များလာပါသည်။
၄။ လွန်ခဲ့တဲ့ တနှစ် နှစ်နှစ်မှာတော့ မှန်အောင်ရေးသားတတ်သူနဲ့ မှန်အောင်ရေးသားရဲသူဦးရေ အနည်းငယ်မျှ တိုးလာသည်ကို တွေ့လာရပါသည်။
၅။ လူကြီးမင်းများသဘောအတိုင်းသာ ဖြစ်ပါသည်။ လူကြီးမင်းများဆိုသည်မှာ သင်ကိုယ်တိုင်နှင့် သင့်အထက်က အာဏာရှိသူများကို ဆိုလိုပါကြောင်း။
မြန်မာ့မြေပေါ်နဲ့ စာမျက်နှာတွေပေါ်မှာ စက်ကွင်းမလွတ်လို့ သေကျေပျက်စီးတာတွေ များလွန်းလှပြီ။
ဒေါက်တာတင့်ဆွေ
Comments
Post a Comment