Starbucks Frappuccino Mocha Iced Coffee ကော်ဖီ မေးခွန်း

- ဆရာ ဘာ ကော်ဖီ သောက်သလဲ။

ကျွန်တော် မနက်တိုင်းမှာ ကော်ဖီတခွက် သောက်တာ နှစ်တွေကြာပြီ။ ငယ်ငယ်ကတော့ အမေကျွေးတဲ့ ထမင်းကြမ်းကြော်။ နယူးဒေလီမှာတုန်းကတော့ 'ကျာယေး' ခေါ် လက်ဖက်ရည်။

ဒီအရပ်ကိုရောက်ပြီး တပတ်တခါလောက် လက်ဖက်ရည်ဆိုင် ထိုင်ဖြစ်ပါတယ်။ တလောက မိတ်ဆွေတယောက်အိမ်မှာ နိုင်ငံရေးစကားဝိုင်းဖွဲ့တော့ လက်ဖက်ရည် ၂ ခွက်လောက်သောက်လိုက်မိလို့ နေမကောင်းဖြစ်ရတယ်။

လွန်ခဲ့တဲ့ ၃ လလောကကစပြီး နှလုံးရောဂါတမျိုးရှိတာသိလာတော့ ဆင်ခြင်ရပြီ။ ကော်ဖီထဲမှာပါတဲ့ 'ကေဖင်း' ဓါတ်က ရင်တုန်စေတယ်။

မနက်တိုင်းမှာ အများအားဖြင့် ဒေါ်မြမြအေးက Nescafe coffee ကော်ဖီ ဖျော်ပေးပါတယ်။ ကိုယ့်ကအရင်နိုးရင်တော့ အလွယ်လမ်း လိုက်ရတယ်။ Coffeemix အထုပ်လေး ၂ ထုပ်ကို မတ်ခွက်တခွက်နဲ့ ကိုယ်တိုင်ဖျော်ပါတယ်။

ကျွန်တော့အတွက် အိပ်ရာထပြီး နေ့တဝက်အထိ ညကလာထားတဲ့ မေးခွန်းတွေဖြေ၊ ညက ရေးထားတဲ့စာတွေထဲက အမှားတွေကို လိုက်ရှာ ပြန်ပြင်ရပါတယ်။ ဒီနေ့ ၇ လုံးလောက် အမှားပြင်ရတယ်။ ထောက်ပြပေးသူတွေ ကျေးဇူး။

အချိန်က ကျွန်တော့အတွက် တန်ဖိုးရှိတယ်။ မဟုတ်ကဟုတ်က ကွန်မင့်တွေ လိုက်ဖျက်နေရတာက အချိန်ကုန်တယ်။ ဆဲရေးရိုင်းစိုင်းသူတွေကို 'ရီပို့' လုပ်၊ 'ဘလော့' နေရတာကလည်း တဒုက္ခ။ တချို့ကတော့ တင်ထားတဲ့စာ ၁-၂ ပုဒ်လောက်သာဖတ်ပြီး ကြီးကြီးကျယ်ကျယ် ရေးကြတာကလည်း တဒုက္ခ။ မနေ့ညက အဲလိုကွန်မင့် ၂ ခုလာတယ်။ 'ဘလော့' ပါရန်လို့ ပြန်ရေးထာတယ်။

မကြာသေးခင်ကစပြီး ပုံထဲက frappuccino starbucks ကော်ဖီပုလင်းကို ဝယ်ထားတယ်။ အလွယ်လမ်းလိုက်တာဖြစ်ပါတယ်။ ရေနွေးတည်၊ ကော်ဖီခွက်ရှာ၊ ကော်ဖီမှုန့် ၂ ဇွန်း၊ သကြား ၂ ဇွန်း၊ 'ကော်ဖီမိတ်' ၂ ဇွန်း စတာတွေနဲ့ ဖျော်နေစရာ မလိုတော့။

အချိန်က ကျွန်တော့အတွက် တန်ဖိုးရှိတယ်။

Coffee Brand Names ကော်ဖီ အမည် https://dr-tint-swe.blogspot.com/2022/06/coffee-brand-names.html

Coffee and Health ကော်ဖီ နဲ့ ကျန်းမာရေး https://dr-tint-swe.blogspot.com/2021/01/coffee-and-health.html

Coffee mix ကော်ဖီမစ် နဲ့ ကျန်းမာရေး https://dr-tint-swe.blogspot.com/2021/08/coffee-mix.html

Coffee ဒေါက်တာတင့်ဆွေရှင့် https://dr-tint-swe.blogspot.com/2022/10/coffee.html

Excess caffeine health warning https://dr-tint-swe.blogspot.com/2021/05/excess-caffeine-health-warning.html

Tea ချိုပေါ့ကျ တခွက် https://burmese-spelling.blogspot.com/2025/01/tea_25.html

ဒေါက်တာတင့်ဆွေ