ကျွန်တော့ကို မေးတာ မဟုတ်ပါ။ တင်ထားတာတခု ဖြစ်ပါတယ်။
ကျေးဇူးတင်ပါသည် နှင့် ကျေးဇူးတင်ရှိပါသည် တို့၏ အခြေခံအဓိပ္ပါယ်မှာ လွန်စွာတူညီပြီး "ပြုခဲ့ဖူးသော ကျေးဇူးကို သိရှိဝမ်းမြောက်သည်" ဟုပင် အဓိပ္ပါယ်ရပါသည်။ သို့သော် ဝါကျဖွဲ့စည်းပုံနှင့် သဒ္ဒါအရ သုံးစွဲပုံ အနည်းငယ် ကွဲပြားမှု ရှိပါသည်။
၁။ ကျေးဇူးတင်ပါသည်
"ကျေးဇူး" (နာမ်) + "တင်" (ကြိယာ) + "ပါ" (ယဉ်ကျေးပြ နောက်ဆက်) + "သည်" (ဝါကျဆုံး နောက်ဆက်) ဖြစ်ပါသည်။
သုံးစွဲပုံ: စာတွေ့ရော စကားပြောပါ အသုံးများသော ပုံမှန် မြန်မာစကားပြေ အသုံးအနှုန်း ဖြစ်ပါသည်။ ရှင်းလင်း၍ ပုဂ္ဂလိကဆန်သော၊ ရင်းနှီးယဉ်ကျေးသော ဆက်ဆံရေးများတွင် သဘာဝကျကျ သုံးစွဲကြပါသည်။
၂။ ကျေးဇူးတင်ရှိပါသည်
"ကျေးဇူး" (နာမ်) + "တင်" (ကြိယာ) + "ရှိ" (ကြိယာ) + "ပါ" + "သည်" ဖြစ်ပါသည်။
"တင်" ဟူသော ကြိယာနောက်တွင် "ရှိ" ဟူသော ကြိယာတလုံး ပိုမိုဖြည့်စွက်ထားခြင်း ဖြစ်ပါသည်။ ရုံးသုံးစာ၊ ထုတ်ပြန်ချက်၊ တရားဝင် မိန့်ခွန်းများ သို့မဟုတ် အလေးအနက်ထားပြလိုသော သဝဏ်လွှာများတွင် ပိုမိုသုံးစွဲလေ့ ရှိကြပါသည်။
ခက်ဆစ်နှင့် ရေးထုံးဆိုင်ရာ သုံးသပ်ချက်
နှစ်ခုစလုံးသည် "ကျေးဇူးကို ဝန်ခံသိရှိသည်" ဟူသော နဂိုအဓိပ္ပါယ်ချင်း ထပ်တူဖြစ်ပါသည်။
"ကျေးဇူးတင်ရှိပါသည်" ဆိုသည်မှာ ရုံးသုံးနှုတ်ဆက်အသုံးအနှုန်းအဖြစ် ခေတ်ပေါ် စာရေးသားပုံများတွင် အလေးအနက်ဖြစ်စေရန် ကြိယာထပ်၍ သုံးစွဲလာကြခြင်း ဖြစ်ပြီး၊ "ကျေးဇူးတင်ပါသည်" ကမူ လိုရင်းတိုရှင်းနှင့် မူလစံကိုက် မြန်မာစကားပြေအသုံး ဖြစ်ပါသည်။
စာရေးသားရာတွင် မူလအသုံးဖြစ်သော "ကျေးဇူးတင်ပါသည်" ကို သုံးစွဲခြင်းက ပိုမိုရှင်းလင်း၍ သဘာဝကျလှပါသည်။
အဘိဓာန်တွင် "ကျေးဇူးတင်" ကို အဓိပ္ပါယ် ၂ မျိုး ဖွင့်ဆိုထားပါသည် -
၁။ သူတပါးက ပြုသော ကျေးဇူးကို အောက်မေ့ချီးကျူးပြောဆိုသည်။
ဥပမာ - "ကျေးဇူးမတင် လင်မရ" (ပုံ)
၂။ သူတပါးပြုသော ကောင်းမှုအကြွေးသည် မိမိအပေါ်၌ တင်ရှိသည်။
"ပစ္စည်းလေးပါး သင်္ဂြိုဟ်၍ ကျေးဇူးတင်သော ဒါယကာတို့ကို တရားဟောခြင်းဖြင့် ဆပ်လေကုန်" (ပါရာ ၁၂)
"ကျေးဇူးတင်ရှိပါသည်" ဟူသော အသုံး
"ကျေးဇူး... မိမိအပေါ်၌ တင်ရှိသည်" ဟူသော သဘောကို အခြေခံ၍ နောက်ပိုင်းတွင် "ကျေးဇူးတင်ရှိပါသည်" ဟု ကြိယာထပ်ကာ အလေးအနက်ပြု၍ ရေးသားသုံးစွဲလာကြခြင်း ဖြစ်ပါသည်။
သို့သော် ပထမအဓိပ္ပါယ်အတိုင်း မိမိက ကျေးဇူးကို သိရှိအောက်မေ့ကြောင်း ချီးကျူးပြောဆိုသည့်အခါတွင်မူ "ကျေးဇူးတင်ပါသည်" ဟု မူလအတိုင်း သုံးစွဲခြင်းက ပိုမိုရှင်းလင်းပြီး သဘာဝကျလှပါသည်။
ကျေးဇူးပြု — ကြိ / ကျေးဇူးပျု / အကျိုးဖြစ်ထွန်း စေသည်။
သာဓက - "သစ်မြစ်သည် ပင်စည် စသည်တို့အား ကျေးဇူးများ၏။ ကျေးဇူးပြု၏။" (ပဋိစ္စဖွင့်။ ၄၆၆)
ကျေးဇူးရှိ — ကြိ / ကျေးဇူးယှိ / ၁။ အကျိုးရှိသည်။ ၂။ သူတပါးပြုသောကျေးဇူး သက်ရောက်သည်။
ကျေးဇူးရှင် — န / ကျေးဇူးယှင် / ကျေးဇူးပြုသောသူ။
ကျေးဇူးတင်ပါတယ်ရှင် (သီချင်း) https://www.youtube.com/watch?v=5patDSY-8fk
ကျေးဇူးကြီးပေ တို့မေမေ (သူငယ်တန်းဖတ်စာ)
ဝန်ထောက် လက်ဖက်ရည်၊ ဝန်ထောက်ထမင်းတို့ကို စားခဲ့ရသော ဦးသာရကြီးမှာ ရွာထဲတွင် အတော်ပင်ထင်ပေါ် ဂုဏ်ရှိ၍လာလေသတည်း။ ဦးသာရကား မောင်လူအေးအား ကျေးဇူးတင်၍ မဆုံးတော့ပြီ။ (သိပ္ပံမောင်ဝ)
ဒေါက်တာတင့်ဆွေ
Comments
Post a Comment