မဲဇာတောင်ခြေ ရတုပိုဒ်စုံ

မဲဇာတောင်ခြေဘွဲ့ ပတ်ပျိုးနဲ့ မတူပါ။

(၁)

မဲဇာတောင်ခြေ၊ စီးတွေတွေတည့်၊ မြစ်ရေဝန်းလည်၊ မြိုင်တောစည်က၊ ရွေပြည်ကိုသာ၊ တရှာတော့မိ၊  မိုးရှိရှိလျှင်၊ သီရိကျက်သရေ၊ တက်ဖြိုးစေသား၊ အောင်မြေကြော့ကြော့၊ ကုန်းမော့မော့နှင့်၊  ဘိုးတော့်ကောင်းမှု၊ တည်ထားပြုသည်၊ ဇဗ္ဗူ့ဆီမီး၊ ခြောက်ရောင်ညီးမျှ၊ ဂူကြီးသခင်၊ ရွှေလင်းပင်နှင့်၊ ရွှေခြင်္သေ့မွေ၊ စရွေ့ရေသော်၊ ရွှေစေတီကြီး၊  အသီးသီးတည့်၊ ပိတ်ဆီးချယ်သန်း၊ လျှပ်ရောင်တန်းမျှ၊  ရွှေနန်းရွှေဘုံ၊ အလုံးစုံကို၊ အာရုံမျက်မြင်၊  ဖူးမြော်ချင်၍၊  သည်တွင်ရွှေမြို့၊  သည်သို့စေတီ၊  သည်ဆီရွှေနန်း၊  ဖြောင့်တန်းတော့မည်၊ စိတ်ကရည်သည်။ ရွှေပြည်ဌာနဝေးသော်ကြောင့်။

(၂)

သဲသာသောင်မြေ၊  မြစ်ကမ်းခြေလည်း၊  အကြေတပြင်၊  တို့အောက်ခွင်ဝယ်၊ ရေရှင်ပတ်ဝန်း၊ ပျော်ဘွယ်ထွန်းလိမ့်၊ တကျွန်းလောက်ပင်၊ ဝေးမည်ထင်ခဲ့၊ စီးသွင်ညိုရစ်၊ မဲဇာမြစ်လည်း၊ ထစ်ထစ်ထွန်းဘိ၊ ချုံအတိနှင့်၊ တောကြီး့ဆိတ်ညံ၊ ဆီးကျံကျံဝယ်၊ ဓူဝံမပေါ်၊ မမျှော်ပါရ၊ နေကိုတလည်း၊ ဘယ်ကရှေ့နောက်၊ဘယ်တောင်မြောက်ဟု၊ တွေးထောက်မမှန်၊ ဖန်ဖန်အံ့သြ၊ ကြံတိုင်းမောစွ၊ ဘယ်တောဘယ်မြိုင်၊ မသိနိုင်ခဲ့၊  မခိုင်စိတ်ဝမ်း၊  နေ့တိုင်းလွမ်းရှင့်၊  ကင်းစမ်းတောင်က၊  လေဦးစ၍၊ နောက်မှလေရှည်၊ အတည်တည်သည်။ လေပြည်လာက အေးသော်ကြောင့်။

(၃)

ပွဲခါညောင်ရေ၊  သွန်းမြဲပေတည့်၊ ရိုသေသဒ္ဓါ၊ ထုံးစဉ်လာဖြင့်၊ မဲဇာရပ်သူ၊ တောင်းဆုယူသည်၊ ရွှေရူတော်နှင့်၊  ရှုတိုင်းတင့်သား၊  မိုးမြင့်သီခေါင်၊ မဲဇာချောင်က၊  တတောင်လုံးမှိုင်း၊ စ ရွေ့ဆိုင်းသော်၊ ထောင့်တိုင်းယှက်ရွှေ့၊  ဝန်းကာဝှေ့သည်၊  တောင်ငွေ့ဝေဝေ၊  အထွေထွေနှင့်၊  လေလည်းရောရာ၊  မိုဃ်းမပါဘဲ၊ သန်ဝါဖြောက်ဖြောက်၊  ဆီးနှင်းပေါက်လည်း၊  မိုဃ်းလောက်ပြင်းထန်၊  သွန်းချပြန်သော်၊  ယုဂန်ထင်ရှား၊တောင်တော်ဖျားက၊  ရထားယဉ်သာ၊ နေစကြာလည်း၊ ရောင်ဝါမထွန်း၊ ချမ်းရှာလွန်း၍၊ တည့်မွမ်းချိန်နေ၊ရောက်လွယ်စေဟု၊ စေ့ရေလှည့်လည်၊ တ လျက်မြည်သည်။ ။ နေခြည်ဖြာမှ နွေးသော်ကြောင့်။ (လက်ဝဲသုန္ဒရအမတ်ကြီး)

- ရွှေပြည်ဌာန တစ်ရှာကြ၏။

- လေပြည်လာက တစ်ရှာကြ၏။

- နေခြည်ဖြာမှ တစ်ရှာကြ၏။

ဒေါက်တာတင့်ဆွေ