လူလုံးပြ ဟန်ရေးကြွယ်။
ရှစ်စထောင် လှည်းယာဉ်ကြော့နဲ့
ပွဲဝင်တော့မယ်။
မမလေး သေးသွယ်သွယ်
လိုက်မယ်ဆို နံ့သာသ
ခန်းဆောင်ကကြွ။
ဆံမြိတ်နွယ် ခိုတောင်ချနဲ့
လက်အပွ ပဒုမ္မာ။
သရက်ထည် ပွင့်ဝါရိုက်နဲ့
လိုက်ဖက်လှပါ။
ပြုံးတော့မဲ့ နွဲ့မူရာ
ပျူငှါလို့ ကြည်ဝင်း။
နွားညီနောင် ခြေကုန်သုတ်အောင်
ယောင်ကြီးရှင် ခါးပုံပြုတ်အောင်
ရုပ်ကကြော့ရှင်း။
ခေါင်းပေါင်းစ တထောင်ထောင်
အရီးလူ လှည်းအိုပျက်က
ပြုံးမျက်စလှောင်။
ဆောင်ပန်းအိမ် လကျာ်ကျက
ဗေါင်းစနဲ့ ပျိုတို့မောင်
ပြုံးယောင်ယောင် တိတ်တခိုး။ ။
ကွမ်းနုဝါ သူငုံလို့
ပန်းပုဝါ သူခြုံလို့
မလေးလုံ အရှက်ကြီးသူမို့
ထီးကာလို့မိုး။ ။
ဘုံကထိန် ဂုဏ်သိန်ဟည်း
စင်တော်ကြီး ရုပ်စုံမြိုင်
ပွဲအုပ်မနိုင်
သူကြီးကမှိုင်
ကျောင်းထိုင်က ညည်း
အုတ်ကျက်ကယ် ဆူညံနှင့်
စင်ဆော်သံ မိုးယံအုပ်
ပတ်တုတ်လို့တီး။ ။
သပြေညို ပင်ပျိုအုပ်မှာ
လှည်းဖြုတ်လို့ နေရာယူ
ပွဲကြည့်တူတူ
ဆောင်းလေကလူ
နှင်းမြူက အဝဲ။ ။
စောင်မြိတ်တို တထည်ထဲမို့
မောင့်ရွှေကိုယ် နံ့သာခဲနဲ့
လူပုံမှာ တူစုံနွှဲရတယ်
မေ့တတ်နိုင်ဘဲ။ ။
တင်မိုး (မန်းတက္ကသိုလ်)
ကဗျာမဂ္ဂဇင်း
မှတ်ချက် -
ကူးတင်ကြတာချို့ နည်းနည်းစီ လွဲနေကြတာ တွေ့တယ်။
‘တထည်’ လို့ ရေးတာကို ‘တစ်ထည်’ လို့ မပြင်ရပါ။
‘ဗေါင်းစ’ လို့ မောက်ချနဲ့ ပုံနှိပ်ထားတယ်။ ‘ဗောင်း’ လည်းမှန်ပေမဲ့ မပြင်သင့်ပါ။
‘ထဲ’ လို့ရေးတာကိုလည်း ‘တည်း’ လို့ မပြင်ရပါ။ ‘နှစ်ယောက်ထဲနေချင်တယ်’ သီချင်းလည်း ရှိတယ်။
ဆရာ ‘တင်မိုး’ က အဲဒီကာလမှာ ‘တင်မိုး (မန်းတက္ကသိုလ်)’ လို့ ကလောင်အမည်ယူခဲ့တယ်။ ကလောင်အမည်၊ အနုပညာအမည်မှန်သမျှကို ထင်သလို မပြင်ရပါ။
ပညာပိုင်းဆိုင်ရာမူပိုင်ခွင့် IPR ကို လေးစားလိုက်နာရတယ်။
ပုံပို့ပေးသူ ကျေးဇူး။
ဒေါက်တာတင့်ဆွေ
Comments
Post a Comment