ကဝိလက္ခဏာသတ်ပုံကျမ်း

ဒေါက်တာမောင်မောင်ကြီးရေးသားတဲ့ မြန်မာနိုင်ငံ ပညာရေးအဆင့်အတန်း နိမ့်ကျသွားရခြင်း အကြောင်းရင်းနှင့် တရားခံများထဲက ကောက်နှုတ်တင်ပြပါရစေ။

(စ) သမိုင်းပါမောက္ခ ဒေါက်တာသန်းထွန်းက သမိုင်းဘာသာရပ်ဟာ နိုင်ငံတိုင်းအတွက် အရေးကြီးတဲ့ ဘာသာရပ်ဖြစ်လို့ မအအောင်၊ မတုံးအောင် သမိုင်းသင်ရတယ်လို့ အဆိုအမိန့်ရှိခဲ့ဖူး ပါတယ်။ ဒါပေမဲ့ (ဗိုလ်နေဝင်းခန့်တဲ့) ဒေါက်တာညီညီရဲ့ စနစ်သစ် ပညာရေးအရ အမှတ်နည်းတဲ့ လူတွေကို သမိုင်းအဓိက သင်ရန်ပို့ လိုက်တော့ အလွန်ဝါသနာပါပြီး စားကြိုးစားသူ တယောက်တလေကလွဲလို့ သမိုင်းသုတေသီ လူချွန်လူကောင်းများ ထွက်လာရန် မလွယ်ပါ။ မြန်မာစာ အဓိကဘာသာရပ်မှာလည်း ထိုနည်း၎င်း ဖြစ်သွားပါတော့တယ်။

မြန်မာစာအတွက် ပိုကံဆိုးတာကတော့ အာဏာရှင်ဗိုလ်နေဝင်း မြန်မာစာကော်မရှင်မှာ နာယကတက်လုပ်ပြီး သတ်ပုံ၊ သဒ္ဒါတို့ကို သူ့စိတ်တိုင်းကျရေးဆွဲ ပြင်ဆင်ခိုင်းလိုက်ခြင်းပင်ဖြစ်ပါတယ်။ ဆရာကြီးဦးဝန်လိုပုဂ္ဂိုလ်ကိုတောင် မကျက်တကျက်ဖုတ်ထားတဲ့ပေါင်မုန့်လို မနူးမနပ် မတတ်တတတ်လူလို့ ဗိုလ်နေဝင်းက သရော်တော်တော်ပြောခဲ့ပါတယ်။ အကျယ်ကိုဆရာကြီးကြေးမုံဦးသောင်း ရေးခဲ့ပြီးဖြစ်ပါ တယ်။ တလောကမိုးမခမှာပါသွားတဲ့ ဦးခင်မောင်စော (ဘာလင်) ရဲ့ မြန်မာစာနဲ့ပတ်သက်တဲ့ဆောင်းပါးတခုမှာလဲ အလားတူထောက်ပြထားပါတယ်။ ဒါကြောင့် အသေးစိတ် ထပ်မရေးလိုတာ့ပါ။ မြန်မာပြည်ထဲက လူများမှာတော့ ဓားဂုတ်ပေါ်ဝဲပြီး သုံးခိုင်းနေလို့ မချစ်သော်လည်းအောင့်ကာ နမ်း ဆိုသလို ကြိတ်မှိတ်ပြီး ဒီသတ်ပုံကျမ်းသုံးနေရတာကို နားလည်နိုင်ပါတယ်။ ဒါပေမဲ့ ပြည်ပရောက် စစ်အစိုးရကို ဆန့်ကျင်နေသူများထုတ်တဲ့ သတင်းစာ၊ ဂျာနယ် စတာတွေကလဲ ဒီသတ်ပုံကျမ်းအတိုင်း လိုက်နာရေး နေကြတာကတော့ ဝမ်းနည်းစရာပါ။ အများညီ ဤကိုကျွဲဖတ်ကြဆိုသလိုဖြစ်နေပါတယ်။ အများ မိုးခါးရေသောက်နေကြတော့လဲ ကျွန်တော် အပါအဝင်လူအများစုဟာ ရောယိမ်းလိုက်၊ ဘသားယိမ်းလိုက် လုပ်မိသွားကြပါတယ်။ ဆရာကြီးကြေးမုံ ဦးသောင်းကတော့ ကွယ်လွန်တဲ့အထိ စစ်အစိုးရရဲ့သတ်ပုံကျမ်းကို သပိတ်မှောက်ပြီး ကဝိလက္ခဏာသတ်ပုံ သတ်ညွှန်း အတိုင်းသာ ရေးသားခဲ့ပါတယ်။ (ဆုံး)

မှတ်ချက် 

၁။ ဒေါက်တာမောင်မောင်ကြီးရေးတယ်ဆိုပြီး မှန်အောင်ရေးထားခဲ့တာတွေကို မှားအောင်ပြင်တင်၊ ပြင်ထုတ်နေခြင်းဟာ ဒေါက်တာမောင်မောင်ကြီးကို စော်ကားရာကျတယ်။

ကဝိလက္ခဏာသတ်ပုံကျမ်းကို စိန္တကျော်သူ ဦးဩက သတိုးမင်းခေါင်ရဲ့ တိုက်တွန်းချက်အရ ရေးသားခဲ့တယ်လို့ ဆိုပါတယ်။ မောင်သြဟာ ဘုတလင်၊ မောင်းထောင်ရွာမှာ ၁၀၉၈ ခုနှစ်မှာမွေးတယ်။ ဟံသာဝတီရောက်မင်းနဲ့ သတိုးမင်းခေါင်ထံမှာ ခစားရတယ်။ ၁၁၁၃ ခုနှစ် တော်သလင်းလဆန်း ၁၁ ရက်နေ့မှာ ကျမ်းပြီးစီးတော့ အသက် ၁၅ နှစ်သာရှိသေးတယ်။ ကဝိလက္ခဏာသတ်ပုံကျမ်းမှာ ဆန်း၊ အလင်္ကာ၊ သဒ္ဒါ၊ ဗျာကရုဏ်း၊ ရှေးထုံးပုံပြင်၊ ရာဇဝင်သမိုင်း၊ သံပိုင်းမော်ကွန်း စတဲ့ လောကီနှင့် လောကုတ္တရာကျမ်းတွေကလာတဲ့ ဗဟုသုတ အဆီအနှစ်တွေနဲ့ ပြည့်စုံတယ်လို့ ချီးမွမ်းခြင်းခံရတယ်။

အခုတော့ လောကီနဲ့ လောကုတ္တရာကျမ်းတွေကလာတဲ့ ဗဟုသုတအဆီအနှစ်တွေနဲ့ပြည့်စုံတဲ့ သတ်ပုံကျမ်းတွေ တရားမဝင်ဖြစ်ကုန်ပြီ။

ကဝိလက္ခဏာသတ်ပုံ လေးစောင်တွဲ ပါဠိဆရာဦးဖြေ သုတ်သင်ပြင်ဆင်သည်

၁။ ရောင်ခြည်ခြောံသွယ်၊ ဘဝဂ်ကယ်၊ အံ့ဘွယ်ဆဲ့ရှစ်ဖြာ။

၂။ ပရိသတ်လယ်၊ ပျော်စံပယ်၊ ဘုန်းကြွယ်လူ့ထွတ်ချာ။

၃။ ရနံ့မပြယ်၊ ပန်းစပယ်၊ ခက်သွယ်နှာမောင်းဖြာ။

၄။ မုရင်းတံစယ်၊ ကောက်သန်လယ်၊ ကတွယ်မစိုက်ရာ။

၅။ ပျိုပျိုရွယ်ရွယ်၊ နောင့်ဆွေမယ်၊ ချစ်ဘွယများသည်သာ။

၆။ မင်းဆက်ငါးသွယ်၊ ရှင်ဘို့မယ်၊ နန်းလယ်တင်သဉ်သာ။

၇။ လဟာပြင်ကျယ်၊ မိုးမှာကြယ်၊ ပြိုင်ဆွယ်မနှုန်းရာ။

၈။ ပိန်းကောလှေငယ်၊ မြစ်ပင်လယ်၊ အလွယ်မကူးသာ။

၉။ အရိပ်နည်းငယ်၊ မကုံကယ်၊ ကုန်စယ်သွားလေပါ။

၁၀။ ဖေါင်းစိမ်းသက်ငယ်၊ ကိုင်းစက်စယ်၊ ပိတ်ကွယ်မိုးရှက်ကာ။ 

၁၁။ တုံ့ပယ်တုံ့ပယ်၊ ယက်ကန်းရှယ်၊ သွတ်လှယ်ပြန်လူးလာ။

၁၂။ သပ်သပ်ပါယ်ပါယ်၊ ပျိုနုနယ်၊ ထက်ဝယ်ဘွဲ့ခွေကာ။

၁၃။ မင်းပရိယာယ်၊ ငတင့်တယ်၊ နားဝယ်မလည်ရှာ။

၁၄။ ပြက်ပြက်ပြယ်ပြယ်၊ ငရဲးလွယ်၊ မျိုးနွယ်မြတ်ဆန်းသာ။

၁၅။ ရတုချဘွယ်၊ အသွယ်သွယ်၊ ခြောက်ဆယ်ကိရိယာ။

၁၆။ ဆန်းဆန်းကြယ်ကြယ်၊ ပညာကျယ်၊ တဆယ်ဥပစာ။

မှတ်ချက် 

၂။ ဆန်းဆန်းကြယ်ကြယ်၊ ပညာမကျယ်၊ 'တစ်ဆယ်' ဥပမာ။

ဒေါက်တာတင့်ဆွေ

၁၅-၁၀-၂၀၁၉