မြန်မာစာကို ဥုံဖွနဲ့ မရပါ

ကွန်မင့်တခု = ဇင်ယော် ကြက်ခြေအမှား။ စင်ရော် ကြက်ခြေအမှန်။

ပြန်စာ

စင်ယော်၊ ဇင်ယော်၊ စင်ရော် မူကွဲစာလုံးတွေဖြစ်ပါတယ်။

အဲလို အမှန်ခြစ် အမှားခြစ်တွေနဲ့ စာလုံးပေါင်းရွေးပြကြတာတွေ တင်ကြတယ်။ ကွန်မင့်ကနေလာကြတယ်။ မှန်တာရယ်လို့ ရှားတယ်။ 

မြန်မာစာမှာ အမှန်၊ အမှားနဲ့ မူကွဲစာလုံးရယ်လို့ရှိတယ်။ တရားသေအမှန် အမှား ပြောလို့မရတာမျိုးတွေ။

သတ်ပုံအမှန်အမှားရွေးပေး၊ သင်ပေးနေတဲ့ ဆရာ ဆရာမတွေက မှားနေကြတာမျိုး မကြာခဏတွေ့ရတယ်။

မြန်မာအဘိဓာန် အကျဉ်းချုပ်

စင်ရော် – န / ဇင်ယော် / ၁။ ပင်လယ်ဝ မြစ်ဝတို့တွင် သွားလာ ကျက်စားသော ရေငှက်။ (မြစ်တွေးနှင့် သဏ္ဌာန်တူသည်။)

၂။ မြစ်ကြီးများနှင့် မြစ်လက်တက်ကြီးများတွင် သွားလာ ကျက်စားသော ရေငှက်။ မြစ်တွေးငှက်။ "ဟင်္သာ ဝမ်းပဲ၊ နွဲကာပျံဝေး၊ ပဲထွေးဇင်ရော်၊ ငှက်တော်ဗျိုင်းဖြူ။" သစ္စာ * ၅၄။

စင်ရော်မွေး – န / ဇင်ယော်မွေး / စင်ရော်ငှက်၏ အရောင်နှင့် တူသော ဖြူညိုရောင်ရှိသော အမွေး။ "အကွက်ရွှေသွေး၊ ဇင်ရော်မွေးနှင့်၊ တသွေးနှုတ်အား၊ ငှက်ကြီးကြားသို့၊ စိမ်းပြာ ကွဲလွဲ၊ စေခွဲတတ်စေ။" ကုသ * ၂၂၁။

ကဝိဓဇသတ်ပုံကျမ်း

[ ဇင်-ဇဉ်-ချင် ]

ဇင်။ ။ဇင်ရွေးပင်။ ဇင်အရက်။ သဇင်ပန်း=(သစင်ပန်း)။ ဇင်မင်းရွှေမင်း။ ဇင်ယော်ငှက်=(ဇင်ရော်ငှက်)။ ။

ဇဉ်။ ။ဇဉ်ဖျင်အတတ်။ ပုထုဇဉ်။ ဘောဇဉ်။ သမ္ဗုဇဉ်။ သုံယောဇဉ်။ ဥယျာဇဉ်။ ဂေါရောဇဉ်။ ပယောဇဉ်။ ။

ချင်။ ။ဗောဇ္ဈင်သုတ်။ ။

မြန်မာစာကို 

- အမှန်ခြစ် အမှားခြစ်နည်းက တချို့စာလုံးတွေသာရတယ်။

- ဖေါ်မြူလာထုတ်လို့မရပါ။ ခြွင်းချက်တွေရှိတယ်။

- နံဖိုနံကြားထောက်လို့မရပါ။ 

- စစ်မိန့်ပေးသလို တခွန်းတည်းမရတာတွေက များတယ်။

- ဥုံဖွနဲ့ မရပါ။ 

"ငွေစင်ရော်"

ရေး - မြို့မငြိမ်း

မူရင်းအဆို - ကိုဘစိန် (မြို့မ)

ပြန်ဆိုပဌမ - ဝင်းဦး

မြစ်ယံသဲနုကမ်းစ

ချစ်သံတေးမြကြည်ကြည်

ငှက်ကလေးငွေစင်ရော်

ပျံကာမြူးရှာသည်

သူ့ကိုခေါ်ပါဘဲနဲ့

ခွန်းချွေနူတ်ဆက်ဖော်ရွေသည်

မောင်လဲအဖော်မစုံ တကိုယ်ရေထဲတူညီ

ဒေါက်တာတင့်ဆွေ