သင်္ကဿနဂိုရ်မှာ (၂)

သင်္ကဿနဂိုရ်ဟာ ကနေ့အိန္ဒိယမြေပုံမှာ Sankisa လို့ခေါ်တယ်။ ယူပီပြည်နယ်ထဲမှာ၊ ဒေလီနဲ့ လပ်ခနောင်းမြို့ ကြားမှာရှိတယ်။ Sankassa နဲ့ Sankasia လို့လည်းခေါ်တယ်။ Sankissa နဲ့ Sankasya လို့လည်း ခေါ်တယ်။ အာသောကမင်းကြီးကရှာဖွေပြီး ကျောက်တိုင်စိုက်ထားခဲ့တယ်။ အခုတော့ ပျက်စီးနေပြီဖြစ်တဲ့ စေတီလည်း တည်ထားခဲ့တယ်။ စိတ်ကူးယဉ် ရာမယနဇာတ်ထဲမှာ သီတာမင်းသမီးဖခင် နေခဲ့တယ်လို့ ဆိုထားတယ်။

မြိုတော်ရဲ့အဝင်ဝနေရာဟာ မြတ်စွာဘုရား အဘိဓမ္မာတရားဟောကြားအပြီး တာဝတိံသာနတ်ပြည်ကနေ ပြန်ဆင်းအလာ ဆိုက်ရောက်တဲ့နေရာလို့ မှတ်တမ်းချို့ကဆိုပါတယ်။
ဗုဒ္ဓဘာသာဝင်တွေက သီတင်းကျွတ်လပြည်နေ့မှာ ဆီမီးတွေ မီးရောင်စုံတွေ ထွန်းညှိပူဇော်ကြပါတယ်။ ကျွန်တော်တို့ မိသားစုက သီတင်းကျွန်လပြည့်တိုင်း ရောက်ရှိနေရာဘယ်မှာဖြစ်ဖြစ် မီးထွန်းကြပါတယ်။
ခါတိုင်းတော့ ကျွန်တော့်သက်စေ့ထက် ဖယောင်းတိုင်တတိုင် အပိုထွန်းတယ်။ ကနေ့တော့ ဖယောင်းမီးခွက်အရေအတွက် နည်းလို့ ဆယ်ခွက်တည်းသာထွန်းညှိပူဇော်ပါတယ်။ စိတ်ကတော့ သင်္ကဿနဂိုရ်မှာ။
ဖြည့်စာ
ရှင်တော်ဗုဒ္ဓ တာဝတိံသာ နတ်ပြည်ကနေ သင်္ကဿနဂိုရ်ပြည်ကို ဆင်းလာတယ်ဆိုတဲ့ဇာတ်လမ်းဟာ မူရင်းပါဠိတော်မှ မပါရှိ။ ဘုရားပရိနိဗ္ဗာန်ပြုပြီး အနှစ် (၁၀၀၀) လောက်မှာပြုစုတဲ့ ရှင်မဟာဗုဒ္ဓဃောသရဲ့ အဋ္ဌသာလိနီ အဋ္ဌကထာမှာ စတင်တွေ့ရှိရတာ ဖြစ်တယ်လို့ ဖတ်ရပါတယ်။ သင်္ကဿနဂိုရ်ပြည်နေရာကို ရှာတွေ့ခဲ့တဲ့ အာသောကဘုရင်ကြီးဟာ ဘီစီ ၂၆၈ ကနေ ၂၃၂ အထိ အုပ်စိုးခဲ့ပါတယ်။ ဝီကီပီးဒီးယားထဲမှာပဲ ဂေါတမမြတ်စွာဘုရား ဘီစီ ၅၆၃/၄၈၀ ကနေ ၄၈၃/၄ဝဝ လို့ ဆိုထားတယ်။ ဘုရားပရိနိဗ္ဗာန်ပြုပြီး အနှစ် (၁၀၀၀) လောက်မှာဆိုတာက အာသောကထက် အများကြီးနောက်ကျနေတယ်။
မူရင်းပါဠိတော်နဲ့ သမိုင်းအထောက်အထားတွေ အရေးကြီးသလို ကြည်ညိုစိတ်ထား ခြင်းဟာလည်း အရေးကြီးပါတယ်။ ယဉ်ကျေးမှုအစဉ်အလာတရပ်အဖြစ်လည်း တန်ဖိုးရှိတယ်လို့ ယူဆမိပါတယ်။

သင်္ကဿ (Sankissa - Sankasia, Sankassa နှင့် Sankasya ဟုလည်း ခေါ်ဆိုကြသည်) သည် အိန္ဒိယနိုင်ငံရှိ ရှေးဟောင်းမြို့တမြို့ဖြစ်ပြီး ဂေါတမဘုရားရှင်သည် တုသိတာနတ်ပြည်သို့ ကြွရောက်ကာ မယ်တော်အား တရားဟောကြားတော်မူပြီးနောက် ဤသင်္ကဿမြို့သို့ ပြန်လည် ဆင်းသက်တော်မူရာ နေရာအဖြစ် ကျော်ကြားပါသည်။ ဘုရားဖူးသွားရောက်ရန် အဓိကနေရာကြီး ရှစ်ခုတွင် တခုအပါအဝင်ဖြစ်ပြီး သာဝတ္ထိပြည်မှ ယူဇနာသုံးဆယ် ကွာဝေးပါသည်။ ဂေါတမဘုရားရှင် ပရိနိဗ္ဗာန်စံဝင်ပြီး နှစ်ပေါင်း ၃၀၀ ခန့်အကြာတွင် အသောကမင်းကြီး လာရောက်ဖူးမြော်ခဲ့ပြီး ဆင်ရုပ်ထုထိပ်ဖူး ကျန်ရှိနေသေးသော အသောကေကျောက်တိုင်ကို စိုက်ထူခဲ့ပါသည်။ ထို့ပြင် ဘုရားရှင် နတ်ပြည်မှ ဆင်းသက်တော်မူခြင်းကို အထိမ်းအမှတ်ပြုသည့် စေတီတော်နှင့် ကျောင်းတော်ကိုလည်း တည်ဆောက်ခဲ့ပါသည်။

ယခုအခါ သင်္ကဿမြို့ကို Kampil ကန်ပဲလ် နှင့် Kannauj ကန်နော့ဂ် အကြားရှိ၊ Ikkhumati river အိုက်ခူမာတီမြစ်နှင့်  (Kalinadi) ကာလီနဒီမြစ်၏ မြောက်ဘက်ကမ်းရှိ သင်္ကီဆာ ဘာဆန်တပူရာ (Sankisa Basantapura) အဖြစ် ဖော်ထုတ်သတ်မှတ်ထားကြသည်။ ၎င်းသည် အူတရာပရာဒက်ရှ် (Uttar Pradesh) ပြည်နယ်၊ ဖရုခါဘတ် (Farrukhabad) ခရိုင်အတွင်း တည်ရှိပြီး ဖတေဂါး (Fatehgarh) မြို့၏ အနောက်ဘက် ၂၃ မိုင်၊ ကိမ်ဂန့် (Kaimganj) မြို့၏ တောင်ဘက် ၂၅ မိုင်နှင့် ကန်နော့ဂ် (Kannauj) မြို့၏ မြောက်ဘက် ၄၅ မိုင်အကွာတွင် တည်ရှိပါသည်။
ဒေါက်တာတင့်ဆွေ
၂၅-၁၀-၂၀၁၈