သူသတ်ဩဝါဒ မေတ္တာစာ

 

(ရွှေကျင်ဆရာတော်)

များတကာ သူတော်တို့မှာ

"အော် ... ငါကား

များမကြာ သေရချေ အနိစ္စ အနိစ္စ"

ငါ့ဒကာ ဗိုလ်မင်းမှာ

"ငါသို့သော မင်းယောက်ျား

ပြဒါးသေမှ သေမည်ပ နိစ္စ နိစ္စ"။

များတကာ သူတော်တို့မှာ

"အော်.... ငါကား ဆင်းရဲချေ ဒုက္ခ ဒုက္ခ"

ငါ့ ဒကာ ဗိုလ်မင်းမှာ

"ကာမဂုဏ် ပွဲစုံကျင်းပ၍

အဟော သုခ သုခ"။

များတကာ သူတော်တို့မှာ_

"အော်.... ငါကား အစိုးမရ

အနတ်တ အနတ်တ"

ငါ့ဒကာ ဗိုလ်မင်းမှာ

ကြိမ်မာမာ တလုံးနှင့်

"ဟဲ့ ငါကား အစိုးရ အစိုးရ

နင်မကြောက်လား

သင့်အမေဟာ ထိတ်ခတ်ပါလား

ဝါးညှပ်ပါလား"။

ဘာဝနာ ပြန်ပြောင်းနှင့်

ကာလညောင်း၍ သန်းခေါင်တိုင်

အချိန်ကုန်လို့မှ မအိပ်နိုင်

နက်ဖြန်ခါ ချိုင်မည့်ပုံ

ဗျာပါဒ ဝိတက်နှင့် တညဉ့်ကုန်။

နေအရုဏ် မိုးသောက်ပြန်လျှင်လည်း

များတကာ သူတော်တို့မှာ

"ဗုဒ္ဓေါ ဗုဒ္ဓေါ ဘုရား ဘုရား" နှင့်

ဘုရားရှိခိုးကြ၍ တစာစာ

ငါ့ဒကာ ဗိုလ်မင်းမှာ

"ဟဲ့ ညဦးက ထောင်မှာထားသည့် လူ

ဟဲ့ ယူခဲ့ဦး ငါစစ်မေးမည်။

ဟဲ့ ငမိုက်ခွေး မှန်အောင်လျှောက်

ငါသို့သော မင်းယောက်ျား

လှည့်စားပြန်ပြီ နင်နော်

ကလအော်နှင့် နှက်ချိုးလို့

သွားအားလုံး ကျိုးတော့မည်

မော့လဟဲ့ နင့်လည်ပင်း

နင်းလိုက်ကြလဟဲ့ သေအောင်

ဆွဲခဲ့ပါလား သင်းသျှောင်

လားလားဟယ် ငါ တတောင်စာ ကျွေးရော့မည်

ခွေးမသား ဟိုတတွေလည်း

ကြည့်လို့သာ နေနိုင်လေ"။

အထွေထွေ အလာလာ

ဘုရား ဒကာကို ဆဲ

ကျောင်း ဒကာကို မဲ

ဆင်းရဲသား တရာ

ငိုမျက်နှာ မြင်ရမှ

မင်းမျက်နှာ တကိုယ်ရသည့်

ရာဇကိစ္စနှင့် တနံနက်မျော။

ရောတခါ နေ့လယ်ချမ်းတိုင် ရောက်လျှင်

များတကာ သူတော်တို့မှာ

ဘာဝနာ ကျွက်ကျွက်ညံ

စာအံသံနှင် တအုန်းအုန်း။

ငါ့ဒကာ ဗိုလ်မင်းမှာ

ကြိမ်တံဖျာ ရိုက်သံနှင့် တဘုံးဘုံး

ဟေးလားဝါးလား ပျော်ပွဲစား၍ တပြုံးပြုံး

အရပ်နီး သူတော်တို့မှာ မုန်းစရာ

သမ္ဖပ္ပလာနှင့် တနေ့ကုန်။

အချိန်လွန် ညနေချမ်း ရောက်ပြန်ခါ

များတကာ သူတော်တို့မှာ

ပန်းကလာပ် ထွေထွေလာ

ပန်းညောင်ရေ အဖြာဖြာနှင့်

သူ့ထက်ငါ ဘုရားသွား။

ငါ့ဒကာ ဗိုလ်မင်းမှာ

ကြေးစည်သံ မြိုင်မြိုင်ကြား၍သော်မှလည်း

မေးတင်းမှ မပြုအား

ဆင်ပြင်လား မြင်းပြင်လား

သူခိုးဖမ်းလား ဓါးပြဖမ်းလား

သူသတ်ထောင်ကိုသာ ခါခါသွား။

ဥပုသ်သီလများကို ဆိုပြန်လျှင်လည်း

လပြည့်နေ့သော လကွယ်နေ့သော

သူပြောမှ ဟုတ်ဟန်ရှိ

မသိတခါ သိတခါ

ရှင် နှစ်ဝါ သုံးဝါ ပတ်လုံး

ဆုံးမခဲ့သည့် ငါ့တရား

မင်းမြှောက်စား၍ တက်တက်ဖြူ။

ကျောင်းစာရေးသူငယ်

ဖြစ်လာစဉ် အခါဝယ်လည်း

(၁) မဟော့ရမ်းနှင့် မဟော့ရမ်းနှင့်၊

ဟော့ရမ်း, ပရမ်းပတာ ဖြစ်တတ်သည်။

(၂) မပေါ့လွန်းနှင့် မပေါ့လွန်းနှင့်၊

ပေါ့လွန်း, ဥစ္စာ ကုန်ခန်းတတ်သည်။

(၃) မကြော့ကြမ်းနှင့် မကြော့ကြမ်းနှင့်၊

ကြော့ကြမ်း, သူများ ရယ်သွမ်းသွေးတတ်သည်။

(၄) မရုန့်ကြမ်းနှင့် မရုန့်ကြမ်းနှင့်၊

ရုန့်ကြမ်း, သူများမုန်း၍ ပန်းတတ်သည်။

(၅) မသော့သွမ်းနှင့် မသော့သွမ်းနှင့်၊

သော့သွမ်း, အဝီစိမှာ ခါးပန်းသတ်လိမ့်သည်။

အတည်တည် ဆုံးမခဲ့သည့် ငါ့စကား

နောက်ဖယ်နားတွင် နင်မထား

သားမယား ဖော်ပုံမှာ

တဘဝ တွက်တာနှင့်

သံသရာမှာ ကျွမ်းစောက်ထိုး

အဝီစိမှာ အောက်ဆုံးမျိုး

ကိုယ်ကျိုးကြီး နည်းစရာ။....

(ပထမ ရွှေကျင်ဆရာတော်ဘုရားကြီး)

#ရှေးစာကဗျာများ

မှတ်ရန်

'သတ်' စာလုံးရေးရင် ဘာဖြစ်မယ် ညာဖြစ်တယ်သမားတွေကို ထောင်ဖမ်းသလိုဖြစ်မည်။ ယုန်ကမတိုး ပိုက်ကတိုးနိုင်သည်။ ကန်တော့။

ဒေါက်တာတင့်ဆွေ