တရားမရ မျက်ဒေါသ- သြဝါဒထူးပျို့

အမျက်ကြီးရာ၊ ဆယ့်လေးဖြာကား

ချမ်းသာရိပ်ငြိမ်၊ နန်းစည်းစိမ်နှင့်

ရန်နှိမ်ကိုးပါး၊ မိုးကြိုးသွားကြောင့်

သိကြားအမျက်၊ ဟူးဟူးထွက်၏။ (၁)

အောက်ထက်ဆန်စုန်

တောင်ပံဟုန်ကြောင့်

ဂဠုန်အမျက်၊ ဟူးဟူးထွက်၏။ (၂)

စက်ယန္တယား

ခိုးလျှံများကြောင့်

နဂါးအမျက်၊ ဟူးဟူးထွက်၏။ (၃)

ရန်ဘက်ဖျောက်ဝှေ့ (လှေ့-မူကွဲ)

ဟောက်တတ်လေ့ကြောင့်

ခြင်္သေ့အမျက်၊ ဟူးဟူးထွက်၏။ (၄)

လက်နက်ဆင်မြင်း

ဗိုလ်သင်းပင်းကြောင့်

မင်းတို့အမျက်၊ ဟူးဟူးထွက်၏။ (၅)

အောက်ထက်ကျွန်ကျေး

ရွှေငွေကြေးကြောင့်

သူဌေးအမျက်၊ ဟူးဟူးထွက်၏။ (၆)

မောင်းလက်ခတ်တီး၊ အားအင်ကြီး၍

ထီးကပ္ပနား၊ ဆင်းရဲသားတို့

မာန်အားအမျက်၊ ဟူးဟူးထွက်၏။ (၇)

မခက်ခဲတွန်၊ အမှုပွန်၍

ကျေးကျွန်အမျက်၊ ဟူးဟူးထွက်၏။ (၈)

ဉာဏ်စက်နှံ့ဝန်း၊ ကျမ်းဂန်ပွန်း၍

ရဟန်းအမျက်၊ ဟူးဟူးထွက်၏။ (၉)

ရမ္မက်ကြီးမား၊ လောဘအားကြောင့်

မင်းသားအမျက်၊ ဟူးဟူးထွက်၏။ (၁၀)

မစက်ဒေါသ၊ ဆင်းရူပကြောင့်၊

မိန်းမအမျက်၊ ဟူးဟူးထွက်၏။

ဘုန်းလက်ရုံးအား၊ ကောင်းမြောက်များ၍

ယောက်ျားအမျက်၊ ဟူးဟူးထွက်၏။ (၁၂)

လိုက်ဖက်ဆေးဝါး၊ မန္တရားကြောင့်

သမားအမျက်၊ ဟူးဟူးထွက်၏။ (၁၃)

လေ့ကျက်နှံ့ပြား၊ ဗေဒင်အားကြောင့်

ပုဏ္ဏားအမျက်၊ ဟူးဟူးထွက်၏။ (၁၄)

စဉ်ဆက်မှတ်သား

ဆယ့်လေးပါးသည်

တရားမရ မျက်ဒေါသ။ ။ (ပိုဒ်-၂၄)

(စိန္တကျော်သူဦးသြ)

ရှေးစာကဗျာများ ကျေးဇူး။

ဒေါက်တာတင့်ဆွေ