မင်းကွန်းရွာမှာ
သာယာချမ်းမြ၊ အေးငြိမ်းလှ၏။
ရှေးကတည်ထား၊ ရှေးဘုရားတည့်
ထူးခြားလက်ရာ၊ အနုပညာတို့
ဖြာဖြာစုံညီ၊ ရွာ၌တည်၏။
ရွာဘေးမှသည်၊ ခွေဝန်းလည်သည့်
နဒီဧရာ၊ လှိုင်းဖွာဖွာလျှင်
ညင်သာစီးဆင်း၊ အလှကျင်း၏။
ရွာ၏တောတန်း၊ ရွာပတ်ဝန်းလည်း
စိမ်းလန်းသာယာ၊ အေးရိပ်ဖြာ၍
ထံတျာနွဲ့နွဲ့ ၊ ငှက်တေးဖွဲ့၏။
တရံခါသော်၊ မန်းမြို့တော်မှ
နှစ်ဖေါ်သက်ထား၊ မြေးအဖွားတို့
ဘုရားဖူးမည်၊ လာရောက်လည်စဉ်
သည်ရွာအလှ၊ ခံစားရသော်
ဆန္ဒကိုယ်စီ ဖြစ်ကြ၏။
အရွယ်ရင့်အို၊ အဖွားအိုက
စိုပြေသာယာ၊ သည်နေရာဝယ်
ဖေါ် ရှာမမှီး၊ တကိုယ်တည်းလျှင်
ပွားစီးဘာဝနာ၊တရားရှာ၍
နေပါလိုလှ၊ သူတောင့်တသည်
ကောင်းစွကောင်းစွ သူ့ဆန္ဒ။
အရွယ်နုပျို၊ မြေးမပျိုမူ
စိုပြေသာယာ၊ သည်နေရာဝယ်
သက်လျာသည်းအူ၊ ချစ်သောသူနှင့်
တူယှဉ်မကွာ၊ နွှဲပျော်ကာဖြင့်
နေပါလိုလှ၊ သူတောင့်တသည်
ကောင်းစွကောင်းစွ သူ့ဆန္ဒ။ (မင်းယုဝေ)
ငွေတာရီမဂ္ဂဇင်း (၁၉၆၈ ဩဂုတ်လ)
Listener's Heaven Audiobooks - အသံစာအုပ်
ဒေါက်တာတင့်ဆွေ
Comments
Post a Comment